തന്തൈ പെരിയാർ സ്മാരകത്തിന്റെ ഉദ്ഘാടനം: എം.കെ. സ്റ്റാലിൻ കേരളത്തിൽ; മുഖ്യമന്ത്രിയുമായി വൈകിട്ട് കൂടിക്കാഴ്ച

കോട്ടയം∙ തന്തൈ പെരിയാർ സ്മാരകം ഉദ്ഘാടനം ചെയ്യാൻ തമിഴ്നാട് മുഖ്യമന്ത്രി എം.കെ. സ്റ്റാലിൻ കേരളത്തിലെത്തി. രാവിലെ 10.30ഓടെ കൊച്ചിയിൽ വിമാനം ഇറങ്ങിയ സ്റ്റാലിൻ കാർ മാർഗം കുമരകം ലേക് റിസോർട്ടിൽ എത്തി. ഭാര്യ ദുർഗ സ്റ്റാലിനും ഒപ്പമുണ്ട്. വൈകിട്ടോടെ കുമരകത്ത് എത്തുന്ന മുഖ്യമന്ത്രി പിണറായി വിജയൻ സ്റ്റാലിനുമായി  ചർച്ച നടത്തും. മുല്ലപ്പെരിയാർ അടക്കം ചർച്ചയിൽ വിഷയമാകുമെന്നു തമിഴ്നാട് മന്ത്രി ദുരൈമുരുകൻ നേരത്തേ അറിയിച്ചിരുന്നു.

തമിഴ്നാട് ചീഫ് സെക്രട്ടറി എൻ.മുരുകാനന്ദം, മന്ത്രിമാരായ ദുരൈമുരുകൻ, എ.വി വേലു, എം.പി.സ്വാമിനാഥൻ അടക്കമുള്ളവരും സ്റ്റാലിന് ഒപ്പമുണ്ട്. നാളെ രാവിലെ 10നാണു വൈക്കത്ത് തന്തൈ പെരിയാർ സ്മാരക മന്ദിരം ഉദ്ഘാടനം. ശക്തമായ സുരക്ഷയാണു വൈക്കത്തും കുമരകത്തും ഒരുക്കിയിരിക്കുന്നത്.