ബ്രേക്ക് നഷ്ടപ്പെട്ടെന്നു ഡ്രൈവറുടെ മുന്നറിയിപ്പ്; ശബരിമല തീർഥാടകരുടെ ബസ് കുഴിയിലേക്കു ചെരിഞ്ഞു

പത്തനംതിട്ട ∙ പമ്പാവാലിക്ക് സമീപം നാറണന്തോട് ഭാഗത്ത് ശബരിമല തീർഥാടകരുമായി പോയ കെഎസ്ആർടിസി ബസ് ബ്രേക്ക് നഷ്ടപ്പെട്ട് കുഴിയിലേക്ക് ചെരിഞ്ഞു. മരത്തിൽ തങ്ങി നിന്നതിനാൽ വലിയ അപകടം ഒഴിവായി. അപകടത്തിൽ ആർക്കും പരുക്കില്ല. 

രാവിലെ എട്ടുമണിയോടെയാണ് സംഭവം. ശബരിമല ദർശനം നടത്തി മടങ്ങുകയായിരുന്ന 15 തീർഥാടകർ ബസിൽ ഉണ്ടായിരുന്നു. സൂപ്പർഫാസ്റ്റ് ഡീലക്സ് ബസാണ് അപകടത്തിൽപ്പെട്ടത്. ബസിന്റെ ബ്രേക്ക് നഷ്ടപ്പെട്ടതായി ഡ്രൈവർ യാത്രക്കാർക്ക് മുന്നറിയിപ്പു നൽകി. വാഹനം നിർത്താൻ ശ്രമിച്ചെങ്കിലും സാധിച്ചില്ല. ബസ് മരത്തിൽ തങ്ങി നിന്നതോടെ യാത്രക്കാർ ഉടൻ പുറത്തിറങ്ങി. രണ്ടു ക്രെയിൻ ഉപയോഗിച്ച് ബസ് പിന്നീട് പുറത്തെടുത്തു.