‘വെള്ളാപ്പള്ളിക്കടക്കം ആർക്കും എന്നെ വിമർശിക്കാം; എൻഎസ്എസ് നിലപാടിനെ നേരത്തേയും പ്രശംസിച്ചിട്ടുണ്ട്’

കൊച്ചി∙ താൻ വിമർശനത്തിന് അതീതനല്ലെന്നും സമുദായ നേതാക്കൾക്ക് വിമർശിക്കാർ സ്വാതന്ത്ര്യമുണ്ടെന്നും പ്രതിപക്ഷ നേതാവ് വി.ഡി. സതീശൻ‌. വെള്ളാപ്പള്ളിക്കടക്കം ആർക്കും തന്നെ വിമർശിക്കാം. വിമർശനത്തിൽ കാര്യമുണ്ടോ എന്നു പരിശോധിക്കും. തിരുത്തേണ്ട കാര്യമുണ്ടെങ്കിൽ തിരുത്തും. യുഡിഎഫിനെ വിജയിപ്പിക്കുകയാണ് ലക്ഷ്യം. എൻഎസ്എസിനെ പുതുതായി പുകഴ്ത്തി പറഞ്ഞതല്ല. എൻഎസ്എസ് നിലപാടിനെ 2021 ലും 22ലും പ്രശംസിച്ചിട്ടുണ്ട്. എല്ലാ ജാതി മത വിഭാഗങ്ങളെയും ഉൾക്കൊള്ളുന്ന പാർട്ടിയാണ് കോൺഗ്രസ്. അകന്നുപോയ പല വിഭാഗങ്ങളെയും തിരിച്ചുകൊണ്ടുവന്നുവെന്നും സതീശൻ പറഞ്ഞു.

എഡിജിപി എം.ആർ. അജിത് കുമാറിനെതിരെയുള്ള അന്വേഷണം പ്രഹസനമായിരുന്നു. ആർഎസ്എസ് നേതാക്കളെ അജിത്കുമാർ കണ്ടത് മുഖ്യമന്ത്രിക്ക് വേണ്ടിയാണ്. മുണ്ടക്കൈ- ചൂരൽമലയിലെ പുനരധിവാസം അടിയന്തരമായി നടപ്പിലാക്കണമെന്നും സതീശൻ പറഞ്ഞു.

പ്രിയങ്ക ഗാന്ധി ജയിച്ചത് തീവ്രവാദികളുടെ വോട്ടുകൊണ്ടാണെന്ന് പറയാൻ വിജയരാഘവനേ കഴിയൂ. സംഘപരിവാർ അജണ്ട സിപിഎം കേരളത്തിൽ നടപ്പിലാക്കുകയാണെന്നും സതീശൻ പറഞ്ഞു.