തുനീസിയയിൽ കൈസ് സെയ്ദ് വീണ്ടും പ്രസിഡന്റ്

തുനീസിയ ∙ 90.7% വോട്ടുമായി തുനീസിയൻ പ്രസിഡന്റ് കൈസ് സെയ്‌ദ് വീണ്ടും അധികാരത്തിൽ. ജയിലിലടച്ചതിനാൽ പ്രമുഖ എതിരാളികൾക്ക് മത്സരിക്കാൻ കഴിയാതെ വന്നതോടെ മുഖ്യപ്രതിപക്ഷ കക്ഷികൾ തിരഞ്ഞെടുപ്പിൽനിന്നു വിട്ടുനിന്നിരുന്നു. 28.8% മാത്രമായിരുന്നു വോട്ടിങ്. രണ്ടാം സ്ഥാനത്തെത്തിയ ബിസിനസുകാരൻ അയാച്ചി സമ്മേലിന് 7.4% വോട്ടു മാത്രമേ ലഭിച്ചുള്ളൂ. അഴിമതിയിൽ നിന്നു രാജ്യത്തെ മോചിപ്പിക്കാനുള്ള അവസരമാണു വിജയമെന്നു കൈസ് പ്രഖ്യാപിച്ചു. 

2011 ൽ ജനകീയ പ്രക്ഷോഭത്തിലൂടെ ഏകാധിപത്യ ഭരണം അവസാനിപ്പിച്ച ‘മുല്ലപ്പൂ വിപ്ലവ’ത്തിന്റെ നാടാണ് തുനീസിയ. ഏകാധിപത്യത്തിലേക്കു രാജ്യം വീണ്ടും പോകുന്നുവെന്ന ആരോപണം പ്രതിപക്ഷ കക്ഷികൾ ഉന്നയിച്ചു.