ബഹിരാകാശത്ത് നേട്ടം ‘കാൽ’വരിച്ച് ചൈന; ബഹിരാകാശ നടത്തത്തിൽ പുതിയ റെക്കോർഡ്

വാഷിങ്ടൻ ∙ ബഹിരാകാശ നടത്തത്തിൽ പുതിയ റെക്കോർ‍ഡിട്ട് ചൈനീസ് ബഹിരാകാശ സഞ്ചാരികൾ. 9 മണിക്കൂറിലേറെ നടന്ന് ചൈയ് സുഷെയും സൊങ് ലിങ്ഡോങ്ങുമാണ് ചരിത്രനേട്ടം ‘കാൽ’വരിച്ചത്. ടിയൻഗോങ് ബഹിരാകാശ നിലയത്തിനു പുറത്ത് ചൊവ്വാഴ്ചയായിരുന്നു നടത്തം. നാസ അയച്ച ബഹിരാകാശ സഞ്ചാരികളായ ജയിംസ് വോസും സൂസൻ ഹെംസും 2001ൽ നടന്നതിനെക്കാൾ 4 മിനിറ്റെങ്കിലും ഇവർ കൂടുതൽ നടന്നതായാണ് കരുതുന്നത്.

1965ൽ സോവിയറ്റ് യൂണിയനിൽനിന്നുള്ള സഞ്ചാരികളാണ് ആദ്യമായി ബഹിരാകാശത്തു നടന്നത്. അതിനുശേഷം റഷ്യയും യുഎസും ഇത്തരത്തിലുള്ള നൂറുകണക്കിനു ദൗത്യങ്ങൾ നടത്തിയിട്ടുണ്ട്. ചൈനീസ് സഞ്ചാരികൾ 2008ലാണ് ആദ്യമായി ബഹിരാകാശത്തു നടന്നത്. യുഎസുമായി കടുത്ത ബഹിരാകാശ മത്സരത്തിലാണ് ചൈന.