ഓണത്തിന്‌ വിളമ്പാം, ഊര്‍മ്മിള ഉണ്ണിയുടെ കോവിലകം സ്റ്റൈൽ മാമ്പഴ പുളിശ്ശേരി!
Mail This Article
കുട്ടികള്‍ മുതല്‍ മുതിര്‍ന്നവര്‍ക്ക് വരെ ഒരുപോലെ ഇഷ്ടമുള്ള ഒരു വിഭവമാണ് മാമ്പഴ പുളിശ്ശേരി. എരിവും മധുരവും പുളിയുമെല്ലാം ഒന്നിച്ചുചേര്‍ന്ന ഈ രസികന്‍ കറി ഉണ്ടാക്കാനും വളരെ എളുപ്പമാണ്. ഈയിടെ ഒരു ടിവി ഷോയില്‍, സ്പെഷല്‍ കോവിലകം സ്റ്റൈല്‍ മാമ്പഴ പുളിശ്ശേരി തയാറാക്കുന്നത് എങ്ങനെ എന്നതിനെക്കുറിച്ച് നടി ഊര്‍മ്മിള ഉണ്ണി സംസാരിക്കുകയുണ്ടായി. സാധാരണ മാമ്പഴ പുളിശ്ശേരിയില്‍ നിന്നും അല്‍പ്പം വ്യത്യസ്തമായി ഉണ്ടാക്കുന്ന ഈ വിഭവം തയ്യാറാക്കുന്നതെങ്ങനെയെന്നു നോക്കാം.
ചേരുവകൾ
- നാടന്‍/ചന്ദ്രക്കാരന്‍ മാമ്പഴം - 1 കിലോഗ്രാം
- ശര്‍ക്കര - കാല്‍ കിലോ
- തേങ്ങ -3 പിടി
- മുളകുപൊടി - 1 ടീസ്പൂണ്‍
- മഞ്ഞള്‍പ്പൊടി - മുക്കാല്‍ ടീസ്പൂണ്‍
- തൈര് - 350 മില്ലി
- നെയ്യ് - 1 ടേബിള്‍സ്പൂണ്‍
- കടുക് - 1 ടീസ്പൂണ്‍
താളിക്കാന്‍
- നെയ്യ് - 1 ടേബിള്‍സ്പൂണ്‍
- കടുക് - 1 ടീസ്പൂണ്‍
- ഉലുവ - 1 ടീസ്പൂണ്‍
- വറ്റല്‍മുളക് - 2
- കറിവേപ്പില - 1 പിടി
തയാറാക്കുന്ന വിധം
∙ ശര്‍ക്കര ഉരുക്കി നന്നായി അരിച്ചെടുക്കുക
∙ മാമ്പഴം ഒരു പ്രെഷര്‍കുക്കറില്‍ അല്‍പ്പം വെള്ളം മാത്രം ഒഴിച്ച് വേവിക്കുക. ഉപ്പോ മറ്റു പൊടികളോ ചേര്‍ക്കേണ്ട ആവശ്യമില്ല. ഒരു വിസില്‍ വരുമ്പോള്‍ തീ ഓഫ് ചെയ്ത് മാറ്റി വയ്ക്കുക.
∙ മിക്സിയുടെ ജാറില്‍, തേങ്ങ, മുളകുപൊടി, മഞ്ഞള്‍പ്പൊടി, തൈര് എന്നിവ ചേര്‍ത്ത് നന്നായി വെണ്ണ പോലെ അടിച്ചെടുക്കുക. ഇതിലേക്ക് വെള്ളം ചേര്‍ക്കേണ്ടതില്ല.
∙ നേരത്തെ ഉരുക്കി അരിച്ചുവെച്ച ശര്‍ക്കര പാനി ഒരു ഉരുളിയിലാക്കി അതിലേക്ക് ഒരു ടേബിള്‍സ്പൂണ്‍ നെയ്യ് ഒഴിക്കുക. ഇതിലേക്ക്, നേരത്തെ വേവിച്ചു വെച്ച മാമ്പഴം ചേര്‍ക്കുക. ശര്‍ക്കരപാനിയില്‍ കിടന്ന് മാമ്പഴം നന്നായി വേവിച്ച് വറ്റിച്ചെടുക്കണം.
∙ ശേഷം നേരത്തെ മിക്സിയില്‍ അടിച്ചുവെച്ച തേങ്ങ ഇതിലേക്ക് ഒഴിക്കുക. ഈ സമയത്താണ് ഉപ്പിടേണ്ടത്. രണ്ടു മിനിറ്റ് തിളച്ച ശേഷം തീ ഓഫ് ചെയ്യുക.
∙ ഇനി ഇതിലേക്ക് താളിപ്പ് ചേര്‍ക്കണം. അതിനായി ചീനച്ചട്ടിയില്‍ ഒരു ടേബിള്‍സ്പൂണ്‍ നെയ്യ് ചേര്‍ത്ത് കടുക് പൊട്ടിക്കുക. ഇതിലേക്ക് ഉലുവ, വറ്റല്‍മുളക്, കറിവേപ്പില എന്നിവ ചേര്‍ത്ത് ഇളക്കി, ഉരുളിയിലേക്ക് ഒഴിക്കുക. രുചിയേറും കോവിലകം സ്റ്റൈല്‍ മാമ്പഴ പുളിശ്ശേരി റെഡി!