ചില്ലി ചിക്കൻ ഫ്രൈ, രുചിയിൽ ജഗജില്ലി

ഒരടിപൊളി ചില്ലി ചിക്കൻ ഫ്രൈ രുചിക്കൂട്ട്, വളരെ എളുപ്പത്തിൽ  അതും റസ്റ്ററന്റ് സ്റ്റൈലിൽ തയാറാക്കുന്നത് എങ്ങനെയെന്നു നോക്കാം.

ചേരുവകൾ :

• ബോൺലെസ് ചിക്കൻ (ചതുരകഷണങ്ങളായി അരിഞ്ഞത്) - 300 ഗ്രാം
• ഉപ്പ് – ആവശ്യത്തിന്
• കുരുമുളകുപൊടി - 1 ടീസ്പൂൺ
• മുളകുപൊടി - 1/2 ടീസ്പൂൺ
• സോയ സോസ് - 1 ടീസ്പൂൺ
• മുട്ട - 1
• കോൺഫ്ലവർ - 2 ടേബിൾസ്പൂൺ
• മൈദ - 1 ടേബിൾസ്പൂൺ
• വെജിറ്റബിൾ ഓയിൽ – വറുക്കാൻ ആവശ്യത്തിന്

സോസ് തയാറാക്കാൻ

• വെജിറ്റബിൾ ഓയിൽ - 3 ടേബിൾസ്പൂൺ
• വെളുത്തുള്ളി (അരിഞ്ഞത്) - 1 ടീസ്പൂൺ
• ഇഞ്ചി (അരിഞ്ഞത്) - 1 ടീസ്പൂൺ
• പച്ചമുളക് - 2 എണ്ണം
• സവാളയുടെ അല്ലി - 1
• കാപ്‌സിക്കം (ക്യൂബ്സായി അരിഞ്ഞത്) - 1
• റെഡ് ചില്ലി സോസ് - 1 ടേബിൾസ്പൂൺ
• ടുമാറ്റോ സോസ് - 2 ടേബിൾസ്പൂൺ
• സോയ സോസ് - 1 ടേബിൾസ്പൂൺ
• കോൺഫ്ലവർ കുറുക്ക് - 1 1/2 ടേബിൾസ്പൂൺ കോൺഫ്ലവർ + 1/2 കപ്പ്‌ വെള്ളം
• വിനാഗിരി - 1 ടീസ്പൂൺ
• ഉപ്പ് – ആവശ്യത്തിന്
• സ്പ്രിങ് ഒണിയൻ അരിഞ്ഞത്

തയാറാക്കുന്ന വിധം :

• ഒരു ബൗളിൽ ചിക്കൻ, ആവശ്യത്തിന് ഉപ്പ്, കുരുമുളകുപൊടി, മുളകുപൊടി, സോയ സോസ്, മുട്ട, കോൺഫ്ലവർ, മൈദ എന്നിവ ചേർത്ത് നന്നായി ഇളക്കി യോജിപ്പിച്ച് 30 മിനിറ്റ് അടച്ച് വയ്ക്കുക.

• മാരിനേറ്റ് ചെയ്ത ചിക്കൻ ചൂട് എണ്ണയിൽ 3 - 4 മിനിറ്റ് വരെ വറുത്തെടുത്ത് മാറ്റി വയ്ക്കുക.

• ഒരു ഫ്രൈയിങ് പാൻ ചൂടാക്കി  എണ്ണ ഒഴിച്ച് വെളുത്തുള്ളി, ഇഞ്ചി, പച്ചമുളക്, സവാള, കാപ്‌സിക്കം എന്നിവ ചേർത്ത് 2 മിനിറ്റ് ചെറിയ തീയിൽ വഴറ്റുക. ഇതിൽ റെഡ് ചില്ലി സോസ്, ടുമാറ്റോ സോസ്, സോയ സോസ് എന്നിവ ചേർത്ത് 1 മിനിറ്റ് ഇളക്കി കൊടുക്കുക. ഇതിൽ കോൺഫ്ലവറിന്റെ കുറുക്കും വിനാഗിരിയും ചേർത്ത് 1 മിനിറ്റ് ഇളക്കുക. വറുത്ത ചിക്കനും സ്പ്രിങ് ഒണിയനും ചേർത്ത് നന്നായി കുറച്ച് നേരം ഇളക്കിയ ശേഷം ഗ്യാസ് ഓഫ്‌ ചെയ്യുക. ചൂടോടെ വിളമ്പാം.