ഹോട്ടൽ സ്റ്റൈൽ പൂരി, കൂടെ കിഴങ്ങുമസാലയും

കുട്ടികൾക്കും മുതിർന്നവർക്കും ഒരു പോലെ ഇഷ്ടപ്പെട്ട പൂരിയും കിഴങ്ങു മസാലയും രുചികരമായി തയാറാക്കാം.

ചേരുവകൾ 

• കിഴങ്ങു വേവിച്ചുടച്ചത് - 3
• സവാള - 2 ഇടത്തരം നീളത്തിൽ കനം കുറച്ച് അരിഞ്ഞത്
• പച്ചമുളക് - 2 
• വെള്ളം - കാൽ കപ്പ് 
• കടലപ്പരിപ്പ് - 2 ടീസ്പൂൺ 
• ഉഴുന്നുപരിപ്പ് - 1 ടീസ്പൂൺ 
• കടുക് - 1 ടീസ്പൂൺ 
• മഞ്ഞൾപ്പൊടി - 1/2 ടീസ്പൂൺ 
• മുളകുപൊടി എരിവില്ലാത്തത് - 1/4 ടീസ്പൂൺ
• കറിവേപ്പില
• മല്ലിയില
• വെളിച്ചെണ്ണ 

പൂരിയ്ക്ക് ആവശ്യമായവ 

• ഗോതമ്പു പൊടി - 2 കപ്പ് 
• മൈദ - 2 ടേബിൾസ്പൂൺ 
• റവ - 2 1/2 ടേബിൾസ്പൂൺ 
• നെയ്യ് - 2 ടീസ്പൂൺ 
• ഉപ്പ്‌ - 1 ടീസ്പൂൺ 
• പഞ്ചസാര - 2 നുള്ള്‌
• വെള്ളം - 3/4 കപ്പും 2 ടേബിൾസ്പൂണും (പൊടി അനുസരിച്ചു ചേർക്കുന്ന വെള്ളത്തിന്റെ അളവിന് വ്യത്യാസം വരാം)

പൂരി തയാറാക്കാൻ 

• ഒരു പാത്രത്തിൽ വെള്ളം, റവ, നെയ്യ്, പഞ്ചസാര, ഉപ്പ് എന്നിവ ചേർത്ത് യോജിപ്പിക്കുക. 
• ഗോതമ്പുപൊടിയും മൈദയും ഇട്ടു കൊടുത്തു കുറേശ്ശെ ആയി കുഴച്ചു മാവ് പരുവത്തിൽ ആക്കുക. 
• വെള്ളം കൂടാനോ കുറയാനോ പാടില്ല.
• നന്നായി അഞ്ചു മിനിറ്റ് നേരം കുഴച്ച് അടച്ചു മാറ്റിവയ്ക്കുക. പത്തു മിനിറ്റിന് ശേഷം ചെറിയ ഉരുളകളാക്കി നാല് വശങ്ങളും ഒരേ കനത്തിൽ വൃത്താകൃതിയിൽപരത്തിയെടുക്കുക.
• എണ്ണ നന്നായി ചൂടായതിനു ശേഷം ഓരോന്നായി ചുട്ടെടുക്കുക.

കിഴങ്ങു മസാല തയാറാക്കാൻ 

• കിഴങ്ങു നന്നായി വേവിച്ചുടയ്ക്കുക, ചെറിയ കഷണങ്ങൾ ഉണ്ടാകണം. 
• ഒരു പാനിലോ ചീന ചട്ടിയിലോ മൂന്ന്  ടേബിൾസ്പൂൺ എണ്ണ ഒഴിക്കുക. എണ്ണചൂടാകുമ്പോൾ കടലപ്പരിപ്പ്, ഉഴുന്ന്, കടുക്, പച്ചമുളക്, ചുവന്നമുളക്, കറിവേപ്പില എന്നിവ ഒരുമിച്ചിട്ടു മൂപ്പിക്കുക. കരിയാതെ ശ്രദ്ധിക്കണം. ഇതിൽ അരിഞ്ഞുവച്ച സവാള ചേർക്കുക. സവാളയിൽ ആവശ്യത്തിനുള്ള ഉപ്പിട്ട് വഴറ്റുക. 

• സവാള വെന്തു നിറം മാറി പിങ്ക് ആയി  വരുമ്പോൾ തീ കുറച്ചു വയ്ക്കുക. മഞ്ഞൾപ്പൊടി, മുളകുപൊടി എന്നിവ ചേർക്കുക. രണ്ടു ടേബിൾസ്പൂൺ വെള്ളം കൂടെ ചേർത്ത് ഇളക്കുക. 
• ഇത് നിർബന്ധമായും ചെയ്യുക, പൊടി കരിയാതെ ഇരിക്കാനും കിഴങ്ങു ഇളക്കാൻ എളുപ്പത്തിനും വേണ്ടിയാണു വെള്ളം ചേർക്കുന്നത്. കൂടി പോകാൻ പാടില്ല. ശേഷം വേവിച്ച കിഴങ്ങു ചേർത്ത് 
• ഇളക്കി യോജിപ്പിക്കുക. 

• രണ്ടു ടേബിൾസ്പൂൺ വെള്ളവും ഉപ്പും ചേർത്ത് മസാല വഴറ്റുക. മല്ലിയില ചേർത്ത് വിളമ്പാം. ഗ്രേവി പരുവം ആണെങ്കിൽ വെള്ളം കൂടുതൽ ചേർക്കുക പൂരി മസാല റെഡി.

English Summary : Hotel style Potato Masala and Poori Recipe