ഫ്രൈയിങ് പാനിൽ സൂപ്പർ തന്തൂരി ചിക്കൻ

റസ്റ്ററന്റ് രുചിയിൽ തന്തൂരി ചിക്കൻ വീട്ടിൽ തയാറാക്കുന്നത് എങ്ങനെയെന്നു നോക്കാം.

ചേരുവകൾ

1. ചിക്കൻ - 2 ലെഗ് പീസ്
2. തൈര് - 2 ടേബിൾസ്പൂൺ
3. മഞ്ഞൾപ്പൊടി - 1/4 ടീസ്പൂൺ
4. മുളകുപൊടി - 2 ടീസ്പൂൺ
5. ഉപ്പ് - 1/2 ടീസ്പൂൺ
   ഇഞ്ചി വെളുത്തുള്ളി അരച്ചത് -1/2 ടീസ്പൂൺ
6.ബട്ടർ/ ഒലിവ് എണ്ണ / സൺഫ്ലവർ ഓയിൽ -1 ടേബിൾസ്പൂൺ.

തയാറാക്കുന്ന വിധം :

• ചിക്കനിലെ വെള്ളം തുടച്ചു മാറ്റിയശേഷം വരഞ്ഞു വയ്ക്കുക.
• ചിക്കനിലേക്ക് 2 മുതൽ 5 വരെയുള്ള എല്ലാ ചേരുവകളും ചേർത്തു നല്ല പോലെ തേച്ചു പിടിപ്പിക്കുക.
• മാരിനേറ്റ് ചെയ്ത ചിക്കൻ 1മുതൽ 4 മണിക്കൂർ വരെ ഫ്രിഡ്‌ജിൽ അടച്ചു സൂക്ഷിക്കുക. മസാലകളെല്ലാം നന്നായി പിടിക്കാൻ വേണ്ടിയാണിത്.
• പാകം ചെയ്യുന്നതിന് 30 മിനിറ്റ് മുൻപ് ഫ്രിജിൽ നിന്നെടുത്തു പുറത്ത് വയ്ക്കുക.

ശേഷം ഫ്രൈയിങ് പാനിൽ 1 ടേബിൾസ്പൂൺ ബട്ടർ / ഒലിവ് എണ്ണ / സൺഫ്ലവർ ഓയിൽ ഇതിൽ ഏതെങ്കിലും ഒന്ന് ഒഴിച്ച് ചൂടാക്കുക.

• ചൂടായ എണ്ണയിലേക്ക് ചിക്കൻ ഇടുക.
• ആദ്യത്തെ 1 മിനിറ്റ് ഹൈ ഫ്ലെയിമിൽ വയ്ക്കുക.
• ശേഷം ചിക്കൻ കഷ്ണങ്ങൾ തിരിച്ചിട്ട് 1 മിനിറ്റ് ഹൈ ഫ്ലെയിമിൽ തന്നെ വയ്ക്കുക.
• അതിനുശേഷം ചിക്കൻ വേവുന്നത് വരെ (ഏകദേശം 6 മുതൽ 7 മിനിറ്റ്)  മീഡിയം ചൂടിൽ വേവിച്ചെടുക്കുക.
• പിന്നീട് ഏറ്റവും ചെറിയ തീയിൽ 30 സെക്കന്റ് വീതം മൂടി വെച്ച് ഇരു ഭാഗവും വേവിക്കുക.
• ചൂടോടെ ഉപയോഗിക്കാം

റസ്റ്റ്റന്റ് സ്റ്റൈൽ പുകമണം കൊടുക്കാൻ :

• ഒരു കഷ്ണം ചിരട്ടയോ / കൽക്കരിയോ നന്നായി പുകയ്ക്കുക.
• ഇതൊരു ചെറിയ പാത്രത്തിൽ ഇട്ട് ഫ്രൈയിങ് പാനിൽ വച്ച് 2 തുള്ളി എണ്ണ പുകഞ്ഞ ചിരട്ടയിലേക്ക് ഒഴിച്ച് മൂടി വയ്ക്കുക.
• ശേഷം ചൂടോടെ ഉപയോഗിക്കാം.

English Summary : Thandoori Chicken without Oven and Grill.