എണ്ണ ഒട്ടും ഇല്ലാത്ത അവലോസുണ്ട, ഒരു നാടൻ പലഹാരം

കേരളത്തിന്റെ പരമ്പരാഗത പലഹാരങ്ങളിൽ ഒന്നാണ് അവലോസുണ്ട. എണ്ണ പലഹാരം അല്ലാത്തതിനാൽ ഇത് തികച്ചും ആരോഗ്യകരവുമാണ്. അവലോസ്പൊടി അങ്ങനെത്തന്നെയോ അല്ലെങ്കിൽ  പഞ്ചസാരയും പഴവും ചേർത്തോ  കഴിക്കാം. ഈ അവലോസ്‌പൊടി എളുപ്പത്തിൽ തന്നെ നമുക്ക് അവലോസുണ്ടയാക്കി മാറ്റാനും കഴിയും. 

അവലോസ് പൊടിക്ക്  ആവശ്യമായ ചേരുവകൾ

• പച്ചരി - ½ കിലോഗ്രാം
• തേങ്ങ ചിരകിയത് - ഒരു ഇടത്തരം തേങ്ങ മുഴുവൻ 
• ജീരകം - ½ ടീസ്പൂൺ
• ഉപ്പ് - ½ ടീസ്പൂൺ

അവലോസ് ഉണ്ട തയാറാക്കാൻ

ആവശ്യമായ ചേരുവകൾ:

• ശർക്കര - ¼ കിലോഗ്രാം
• വെള്ളം -. കപ്പ്
• ചെറുനാരങ്ങാ നീര് - ½ ടീസ്പൂൺ
• ചുക്ക് - ഒരു ചെറിയ കഷ്ണം പൊടിച്ചത്
• ഏലക്ക - 3 എണ്ണം പൊടിച്ചത്

തയാറാക്കുന്ന വിധം വിഡിയോ

• അരക്കിലോ പച്ചരി 4 മണിക്കൂർ കുതിർത്തു കഴുകി വാരി വെള്ളം എല്ലാം വാർത്തെടുക്കണം.
• ഇനി ഇത് പുട്ടുപൊടിയുടെ പാകത്തിൽ തരിയോട് കൂടി പൊടിച്ചെടുക്കണം.
• ഇത് ചുവടു കട്ടിയുള്ള ഒരു ഉരുളിയിലേക്ക് മാറ്റാം.
• ഇടത്തരം വലുപ്പമുള്ള ഒരു തേങ്ങ ചിരകിയത് ഇതിലേക്ക് ഇട്ടു കൊടുക്കാം.
• ഇതിലേക്ക് ഇനി നല്ല ജീരകവും ഉപ്പും ചേർത്ത് എല്ലാംകൂടി  കൈകൊണ്ട് നന്നായി തിരുമ്മി യോജിപ്പിക്കുക.
• ഇനി ഇത് തട്ടി പൊത്തി 20 മിനിറ്റ് മൂടി വയ്ക്കണം.
• 20 മിനിറ്റ് കഴിയുമ്പോൾ കൈകൊണ്ട് ഒന്നുകൂടി തിരുമ്മി കട്ടയെല്ലാം ഉടച്ച് എടുക്കണം.
• ഇനി ഇത് ഇടത്തരം ചൂടിൽ വച്ച് ഒരു ബ്രൗൺ നിറമാകുന്നതു വരെ കൈയ്യെടുക്കാതെ നല്ലതുപോലെ വറുത്തെടുക്കാം.
• വറുത്തു കഴിയുമ്പോൾ പാത്രത്തിന്റെ ചൂട് കൊണ്ട് ഇനിയും വറവ് കൂടാതിരിക്കാൻ വേണ്ടി പെട്ടെന്ന് തന്നെ മറ്റൊരു പാത്രത്തിലേക്ക് പരത്തിയിട്ട് കൊടുക്കാം.
• ഇനി ശർക്കര ഒന്നു ഉരുക്കി എടുക്കാം, അതിനായിട്ട് അരക്കിലോ പച്ചരിക്ക് ¼  കിലോ ശർക്കര എന്ന കണക്കിൽ എടുത്തു ½ ഗ്ലാസ് വെള്ളം ഒഴിച്ച് അടുപ്പത്തു വച്ച് ഉരുക്കി  എടുക്കാം.
• ഇത് ഉരുകി വരുന്ന സമയം കൊണ്ട് അവലോസ് പൊടിയൊന്ന് അരിച്ചെടുക്കാം. അരിച്ചെടുത്ത വലിയ തരികളൊക്കെ മിക്സിയിലിട്ട് ഒന്നുകൂടി ഒന്ന് പൊടിച്ചെടുക്കാം. കുറച്ചു ചെറിയ തരികൾ പൊടിക്കാതെ തന്നെ അവലോസ് പൊടിയിലേക്ക് ഇട്ടു കൊടുക്കണം.
• ശർക്കര ഉരുകി ഒരുനൂൽ പരുവം ആകുമ്പോൾ തീ ഓഫ് ചെയ്തു അര ടീസ്പൂൺ ചെറുനാരങ്ങാനീരു കൂടി ചേർക്കാം.
• വറുത്ത അവലോസ് പൊടിയിൽ നിന്ന് 100 ഗ്രാം പൊടി മാറ്റിവയ്ക്കാം, ഇത് ഉണ്ട പിടിക്കാൻ നേരം ആവശ്യമായി വരും.
• ബാക്കിയുള്ള പൊടിയിലേക്ക് ഒരു ചെറിയ കഷ്ണം ചുക്ക് പൊടിച്ചതും മൂന്ന് ഏലക്കായ പൊടിച്ചതും കൂടി ചേർത്ത് നന്നായി ഇളക്കി എടുക്കാം.
• ഇനി ശർക്കര പാനി ചൂടാറുന്നതിനു മുൻപ് തന്നെ വേഗം പൊടിയിലേക്ക് അരിച്ചൊഴിച്ച് ഇളക്കിയെടുക്കണം.
• കൈയ്യിൽ പിടിക്കാൻ പാകത്തിലേക്കുള്ള ഒരു ചൂടിൽ ഇത് എത്തി കഴിയുമ്പോൾ മുഴുവൻ ചൂടാറുന്നതിനു മുൻപ് പെട്ടെന്നു തന്നെ ഇത് ഉരുളകളാക്കിയെടുക്കാം.
• ഇനി ഓരോ ഉണ്ടകളും മാറ്റിവെച്ച പൊടിയിലേക്ക് ഇട്ട് ഒന്നുരുട്ടി എടുക്കാം.

English Summary :Kerala Traditional Avalose Podi And Avalose Unda Recipe.