ഇതാണ് കീര്‍ത്തി സുരേഷിന്‍റെ ആ ഇഷ്ടവിഭവം; മോര്‍ കലിയെക്കുറിച്ച് കേട്ടിട്ടുണ്ടോ?

ഇഡ്ഡലിയും ദോശയും പോലെ, പുളിപ്പിച്ച വിഭവങ്ങള്‍ക്ക് വളരെയേറെ പ്രിയമുണ്ട് ദക്ഷിണേന്ത്യയില്‍. ഇക്കൂട്ടത്തില്‍പ്പെട്ട തന്‍റെ പ്രിയവിഭവം, മോര്‍ കലിയെക്കുറിച്ച് പ്രശസ്ത നടി കീര്‍ത്തി സുരേഷ് ഒരു ഇന്‍റര്‍വ്യൂവില്‍ ഈയിടെ പറഞ്ഞിരുന്നു. മോര്‍ കൂഴ് എന്നും ഈ വിഭവം അറിയപ്പെടുന്നു.

ദക്ഷിണേന്ത്യയിലെ തമിഴ് ബ്രാഹ്മണ കുടുംബങ്ങള്‍ക്കിടയില്‍ വളരെയേറെ പ്രചാരത്തിലുള്ള ഒരു വിഭവമാണ് മോര്‍ കലി. ഇത് വെറും 10-15 മിനിറ്റിനുള്ളിൽ തയ്യാറാക്കാം, കൂടാതെ പ്രാതലോ ലഘുഭക്ഷണമോ ആയി ചൂടോടെ കഴിക്കാം. ഒപ്പം കഴിക്കാന്‍ മറ്റൊന്നും തന്നെ ആവശ്യമില്ല. അതേപോലെ തന്നെ വളരെയേറെ ആരോഗ്യകരവുമാണ് ഈ വിഭവം.

ആവശ്യമുള്ള ചേരുവകൾ

കട്ടിയുള്ള തൈര് (പുളിയുള്ളത്)- 1 കപ്പ്
അരിപ്പൊടി - 1/2 കപ്പ്
 

താളിക്കാന്‍
എള്ളെണ്ണ – 8 ടീസ്പൂൺ
കടുക് – 1 ടീസ്പൂൺ
ഉഴുന്ന് പരിപ്പ് -3/4 ടീസ്പൂൺ
ചുവന്ന മുളക് – 2
കായം – ഒരു നുള്ള്
പച്ചമുളക് -1
കറിവേപ്പില – ആവശ്യത്തിന്

തയാറാക്കുന്ന വിധം

- ഒരു പാത്രത്തിൽ അരിപ്പൊടി എടുക്കുക, ആവശ്യത്തിന് ഉപ്പ് ചേർക്കുക. എന്നിട്ട് അരിപ്പൊടിയിൽ അല്‍പ്പാല്‍പ്പമായി തൈര് ചേര്‍ത്ത് കട്ടകളില്ലാതെ ഇളക്കുക. അതിനു ശേഷം, ഇതിലേക്ക് 1 കപ്പ് വെള്ളം കുറച്ചു കുറച്ചായി ചേർത്ത് വീണ്ടും നന്നായി ഇളക്കുക.

- ഒരു ചീനച്ചട്ടിയില്‍ എണ്ണ ചൂടാക്കി കടുക്, ഉഴുന്ന്, കായം, ചുവന്ന മുളക് എന്നിവ ചേർക്കുക, കടുക് പൊട്ടി വരുമ്പോൾ, പച്ചമുളകും കറിവേപ്പിലയും ചേർക്കുക.

- അതിനുശേഷം 1/4 കപ്പ് വെള്ളം ഈ താളിപ്പിലേക്ക് കുറച്ച് കുറച്ചായി ഒഴിക്കുക. വെള്ളം തിളച്ചുതുടങ്ങുമ്പോൾ തീ ചെറുതാക്കി, നേരത്തെ തയാറാക്കിയ അരിപ്പൊടി+തൈര് മിശ്രിതം ചേർത്ത് തുടർച്ചയായി ഇളക്കുക. 

- തീ ഇടത്തരം ആക്കി നന്നായി വേവിക്കുക. ഉപ്പ് പരിശോധിക്കാം, ആവശ്യമെങ്കിൽ ഈ ഘട്ടത്തിൽ കൂടുതല്‍ ഉപ്പ് ചേർക്കുക.

- വശങ്ങള്‍ വിട്ടുവരാന്‍ തുടങ്ങുമ്പോൾ സ്വിച്ച് ഓഫ് ചെയ്യുക. നിങ്ങളുടെ വിരലുകൾ വെള്ളത്തിൽ മുക്കി മോർ കലിയിൽ തൊടുക, ഇത് കൈയിൽ പറ്റിയാൽ, കുറച്ച് സമയം കൂടി വേവിക്കുക.

- വെന്തു കഴിഞ്ഞാൽ ഒരു പ്ലേറ്റിൽ ഒഴിച്ച് ചൂടോടെ വിളമ്പുക. തണുക്കുമ്പോൾ ഇത് കൂടുതല്‍ കട്ടിയാകും.