ജിഎസ്ടി: അപ്പീലിന് 31 വരെ സമയം

തിരുവനന്തപുരം ∙ ജിഎസ്ടി നിയമത്തിലെ 73, 74 വകുപ്പുകൾ അനുസരിച്ച് അപ്പീൽ ഫയൽ ചെയ്യാൻ വിട്ടുപോയവർക്ക് ഇൗ മാസം 31 വരെ വീണ്ടും അവസരം. സമയപരിധി കഴിഞ്ഞു ഫയൽ ചെയ്തതിനാൽ അപ്പീൽ നിരസിച്ചവർക്കും ഇൗ അവസരം ഉപയോഗിക്കാം. ഡിമാൻഡ് നോട്ടിസിൽ പറഞ്ഞിരിക്കുന്ന തുകയിൽ ആക്ഷേപമില്ലാത്ത സംഖ്യ എത്രയാണോ അത്രയും അടച്ചു കൊണ്ടാണ് അപ്പീൽ ഫയൽ ചെയ്യേണ്ടത്. തർക്കമുള്ള തുകയുടെ 12% മുൻകൂറായി അടയ്ക്കണം. 

വിശദാംശങ്ങൾക്ക് കഴിഞ്ഞ നവംബർ 2 ന് സിബിഐസി  പുറത്തിറക്കിയ 53/2023 സെൻട്രൽ ടാക്സ് എന്ന വിജ്ഞാപനമോ ഡിസംബർ 13ന് സംസ്ഥാന നികുതി വകുപ്പ് പുറത്തിറക്കിയ എസ്ആർഒ 1353/2023ലെ ജിഒ(പി) നമ്പർ 165/2023/ടാക്സസ് എന്ന വിജ്ഞാപനമോ പരിശോധിക്കുക.