നമീബിയയിൽ യുപിഐ: പിന്തുണയുമായി ഇന്ത്യ

ന്യൂഡൽഹി∙ ആഫ്രിക്കൻ രാജ്യമായ നമീബിയയിൽ യുപിഐയ്ക്ക് (യുണിഫൈഡ് പേയ്മെന്റ് ഇന്റർഫേസ്) സമാനമായ ഇൻസ്റ്റന്റ് പേയ്മെന്റ് സംവിധാനം വികസിപ്പിക്കാനായി ഇന്ത്യ പിന്തുണയ്ക്കും. ഇതിനായി ബാങ്ക് ഓഫ് നമീബിയയുമായി നാഷനൽ പേയ്മെന്റ്സ് കോർപറേഷൻ ഓഫ് ഇന്ത്യ (എൻപിസിഐ) കരാർ ഒപ്പുവച്ചു. പല രാജ്യങ്ങളിലെ പണമിടപാട് ശൃംഖലകളുമായി യുപിഐ ബന്ധിപ്പിച്ചിട്ടുണ്ടെങ്കിലും ആദ്യമായാണ് ഒരു രാജ്യത്ത് യുപിഐ പോലൊരു സംവിധാനം വികസിപ്പിക്കാൻ എൻപിസിഐ ഇടപെടുന്നത്.

ഇതുവരെ യുപിഐയുമായി പേയ്മെന്റ് ശൃംഖലകൾ ബന്ധിപ്പിച്ച രാജ്യങ്ങൾ: നേപ്പാൾ, ഭൂട്ടാൻ, ഫ്രാൻസ് (ഇ–കൊമേഴ്സ്), മൊറീഷ്യസ്, സിംഗപ്പൂർ, ശ്രീലങ്ക, യുഎഇ.