സുരക്ഷാ കമ്മിറ്റി രൂപീകരിച്ച് ഓപ്പൺഎഐ

നിർമിത ബുദ്ധി സാങ്കേതിക വിദ്യയിലെ നിർണായകമായ സുരക്ഷിതത്വം ഉറപ്പാക്കാൻ പുതിയ കമ്മിറ്റി രൂപീകരിച്ച് ഓപ്പൺഎഐ. കമ്പനിയുടെ പുതിയ പ്രോജക്ടുകളിലും പ്രവർത്തനത്തിലും സുരക്ഷാ നടപടികളുടെ മേൽനോട്ടം ഈ കമ്മിറ്റി വഹിക്കും. ‘ദ് സേഫ്റ്റി ആൻഡ് സെക്യൂരിറ്റി കമ്മിറ്റി’യിലെ അംഗങ്ങൾ കമ്പനിയുടെ ബോർഡിൽ നിന്നുള്ളവരാണ്. 

ഓപ്പൺ എഐ അവരുടെ പുതിയ നിർമിത ബുദ്ധി മാതൃക അവതരിപ്പിക്കുന്നതിനു മുന്നോടിയായാണ് കമ്മിറ്റി രൂപീകരിച്ചത്. ആർട്ടിഫിഷ്യൽ ജനറൽ ഇന്റലിജൻസ്(എജിഐ) എന്ന അടുത്ത ഘട്ടത്തിലേക്ക് ഇതോടെ ഓപ്പൺ എഐ കടക്കും. വിവിധ മേഖലകളിലെ അറിവ് മനസ്സിലാക്കാനും പഠിക്കാനും പ്രയോഗിക്കാനും കഴിയുന്ന തരം എഐ ആണ് എജിഐ. മനുഷ്യ ബുദ്ധിയുമായി താരതമ്യപ്പെടുത്താവുന്നതാണിത്.