വിറ്റൊഴിയുന്നു വിദേശ നിക്ഷേപകർ

കൊച്ചി∙  തുടർച്ചയായ മൂന്നാം ദിവസവും മൂക്കുകുത്തി വീണതോടെ ഓഹരി വിപണി സൂചികകൾ 2 മാസത്തെ താഴ്ന്ന നിലവാരത്തിലെത്തി. ഇന്നലെ സെൻസെക്സ് 495 പോയിന്റും നിഫ്റ്റി 221 പോയിന്റുമാണ് ഇടിഞ്ഞത്. ഇന്നലത്തെ വിറ്റൊഴിക്കലിലൂടെ നിക്ഷേപകരുടെ ആസ്തിയിലുണ്ടായ കുറവ് 6 ലക്ഷം കോടി രൂപ. ഇന്ത്യൻ വിപണിയിൽ നിന്നുള്ള വിദേശ നിക്ഷേപകരുടെ പിന്മാറ്റമാണ് നഷ്ടത്തിന്റെ പ്രധാന കാരണം.

ബാങ്കിങ്, ഓട്ടോ, റിയൽറ്റി, എഫ്എംസിജി, ഫിനാൻസ് മേഖലകളിലെ ഓഹരികളിലായിരുന്നു ഇന്നലെ കൂടുതൽ വിൽപന സമ്മർദം നേരിട്ടത്. സെൻസെക്സ്30 ൽ ഇന്നലെ 21 ഓഹരികളും നഷ്ടത്തിലാണ് വ്യാപാരം അവസാനിപ്പിച്ചത്. 9 ഓഹരികൾ നേട്ടമുണ്ടാക്കി. രണ്ടാംപാദ ഫലങ്ങൾ പ്രതീക്ഷയ്ക്കൊത്ത് ഉയരാത്തത് പല പ്രമുഖ കമ്പനികളുടെയും ഓഹരി വിലയെ ബാധിക്കുന്നുണ്ട്. രണ്ടാംപാദ ഫലം പുറത്തുവന്നതിനു ശേഷം ബജാജ് ഓട്ടോ ഓഹരിയുടെ വിലയിൽ 13% ഇടിവാണു നേരിട്ടത്.

മികച്ച പ്രവർത്തന ഫലത്തെത്തുടർന്ന് ഐടി ഓഹരികൾ ഇന്നലെ നേട്ടമുണ്ടാക്കി. ഉപഭോക്തൃ വില കൂടിയത് എഫ്എംസിജി മേഖലയെയും ഉത്സവകാലത്ത് പ്രതീക്ഷിച്ച നേട്ടമുണ്ടാക്കാൻ കഴിയാത്തത് ഓട്ടോ മേഖലയെയും അനാകർഷകമാക്കുകയാണ്. ബിഎസ്ഇ മിഡ്ക്യാപ് സൂചിക ഇന്നലെ 1.65% ഇടിഞ്ഞു.സ്മോൾക്യാപിൽ 1.42% നഷ്ടം നേരിട്ടു.