ശ്രീലങ്ക കരുത്തരായ ടീം, കഴിഞ്ഞ ഏഷ്യ കപ്പ് ഫൈനലിൽ ഞങ്ങളെ തോൽപിച്ചവർ: ഷെഫാലി വർമ

ദുബായ്∙ വനിതാ ട്വന്റി20 ലോകകപ്പിൽ ശ്രീലങ്കയ്ക്കെതിരായ മത്സരം നിർണായകമാണെന്നും നിലവിൽ ഏഷ്യയിലെ ഏറ്റവും കരുത്തരായ ടീമുകളിൽ ഒന്നാണ് ശ്രീലങ്കയെന്നും ഇന്ത്യൻ ടീം ഓപ്പണർ ഷെഫാലി വർമ. ലോകകപ്പിൽ കഴിഞ്ഞ ദിവസം പാക്കിസ്ഥാനെതിരായ 6 വിക്കറ്റ് ജയത്തിനു പിന്നാലെയായിരുന്നു ഷെഫാലിയുടെ പ്രതികരണം.

‘പാക്കിസ്ഥാനെതിരായ ജയം നൽകുന്ന ആത്മവിശ്വാസം ചെറുതല്ല. എന്നാൽ കരുത്തരായ ശ്രീലങ്കയെയാണ് അടുത്ത മത്സരത്തിൽ നേരിടേണ്ടത്. കഴിഞ്ഞ ഏഷ്യ കപ്പ് ഫൈനലിൽ ഞങ്ങളെ തോൽപിച്ച ടീമാണ് അവർ. ആ ഫോം അവർ ലോകകപ്പിലും തുടരുകയാണ്’ ഷെഫാലി പറഞ്ഞു.

നാളെ രാത്രി 7.30നാണ് ഇന്ത്യ– ശ്രീലങ്ക മത്സരം. അതിനു പിന്നാലെ 13ന് ഓസ്ട്രേലിയയ്ക്കെതിരെയാണ്  ഇന്ത്യയുടെ അവസാന മത്സരം. രണ്ടു മത്സരങ്ങളിലും മികച്ച റൺറേറ്റോടെ ജയിച്ചാൽ മാത്രമേ ഇന്ത്യയ്ക്ക് സെമി ഉറപ്പിക്കാൻ സാധിക്കൂ.