കരീബിയൻ മണ്ണിൽ 15 വർഷത്തിനിടെ ആദ്യ ടെസ്റ്റ് വിജയം; വിൻഡീസിനെതിരെ ചരിത്രമെഴുതി ബംഗ്ലദേശ്

കിങ്സ്റ്റൻ (ജമൈക്ക) ∙ കരീബിയൻ മണ്ണിൽ 15 വർഷത്തിനിടെ ആദ്യമായി ബംഗ്ലദേശിന് ടെസ്റ്റ് മത്സര വിജയം. രണ്ടാം ടെസ്റ്റിൽ വെസ്റ്റിൻഡീസിനെ 101 റൺസിനു തോൽപിച്ച ബംഗ്ലദേശ് പരമ്പരയിൽ സമനില നേടി (1–1). 287 റൺസ് വിജയലക്ഷ്യവുമായി രണ്ടാം ഇന്നിങ്സ് ബാറ്റിങ്ങിനിറങ്ങിയ വിൻഡീസ് 185 റൺസിന് ഓൾഔട്ടായി. സ്കോർ: ബംഗ്ലദേശ്– 164, 268. വെസ്റ്റിൻഡീസ്–146, 185.

5 വിക്കറ്റ് വീഴ്ത്തിയ ബംഗ്ലദേശിന്റെ ഇടംകൈ സ്പിന്നർ തൈജുൽ ഇസ്‌ലാമാണ് രണ്ടാം ഇന്നിങ്സിൽ വിൻഡീസിനെ തകർത്തത്. 4 വിക്കറ്റ് നഷ്ടത്തിൽ 143 റൺസ് എന്ന നിലയിലായിരുന്ന ആതിഥേയർക്ക് 42 റൺസിനിടെ അവസാന 6 വിക്കറ്റുകളും നഷ്ടമായി.

കഴിഞ്ഞയാഴ്ച നടന്ന ഒന്നാം ടെസ്റ്റിൽ ഉൾപ്പെടെ കരീബിയൻ മണ്ണിൽ നടന്ന കഴിഞ്ഞ 7 ടെസ്റ്റ് മത്സരങ്ങളിലും ബംഗ്ലദേശ് തോൽവി വഴങ്ങിയിരുന്നു.