ഓസീസ് ബാറ്ററെ ‘തള്ളിയതിൽ’ ശിക്ഷ ഉറപ്പ്, വിരാട് കോലി വൻ തുക പിഴയായി അടയ്ക്കേണ്ടിവരും

മെൽബൺ∙ ഓസ്ട്രേലിയൻ ബാറ്റർ സാം കോൺസ്റ്റാസിനെ ചുമലുകൊണ്ട് ഇടിച്ച സംഭവത്തിൽ ഇന്ത്യൻ ക്രിക്കറ്റ് താരം വിരാട് കോലിക്കെതിരെ നടപടിയുണ്ടാകും. മെൽബൺ ടെസ്റ്റിന്റെ ആദ്യ ദിനമാണ് മികച്ച രീതിയിൽ ബാറ്റു ചെയ്യുന്നതിനിടെ സാം കോൺസ്റ്റാസും വിരാട് കോലിയും കൂട്ടിമുട്ടിയത്. മാച്ച് ഫീയുടെ 20 ശതമാനം തുക വിരാട് കോലി പിഴയായി അടയ്ക്കേണ്ടിവരും. കോലിക്കു മുകളിൽ ഒരു ഡീമെറിറ്റ് പോയിന്റും വരും.

ടോസ് നേടിയ ഓസ്ട്രേലിയ മത്സരത്തിൽ ബാറ്റു ചെയ്യാൻ തീരുമാനിക്കുകയായിരുന്നു. 10–ാം ഓവറിനിടെയായിരുന്നു വിരാട് കോലി സാം കോൺസ്റ്റാസിനെ തള്ളിയത്. ഓസ്ട്രേലിയൻ യുവതാരം ഇതു ചോദ്യം ചെയ്തതോടെ വിരാട് കോലി തിരിച്ചുവന്നു താരത്തോടു ചൂടായി. ഇരുവരും തമ്മിൽ വാക്കേറ്റം തുടർന്നതോടെ ഓസീസ് ബാറ്റർ ഉസ്മാൻ ഖവാജയും അംപയർമാരും ചേർന്നാണ് ഇരുവരെയും ശാന്തരാക്കിയത്.

സംഭവത്തിന്റെ വിഡിയോ സമൂഹമാധ്യമങ്ങളിൽ വൈറലാണ്. കോലിയുടെ പ്രതികരണം അനാവശ്യമായിപ്പോയെന്ന് മുൻ ഇന്ത്യൻ താരം രവി ശാസ്ത്രി പ്രതികരിച്ചു. ഗ്രൗണ്ടിലെ മത്സരത്തിനിടെ ഇതൊക്കെ സാധാരണ സംഭവമാണെന്നും കാര്യമായി എടുക്കേണ്ടെന്നുമായിരുന്നു സാം കോൺസ്റ്റാസ് മാധ്യമങ്ങളോടു പ്രതികരിച്ചത്. ഓപ്പണറായി ഇറങ്ങിയ സാം കോൺസ്റ്റാസ് 65 പന്തിൽ 60 റൺസെടുത്താണ് ആദ്യ ഇന്നിങ്സിൽ പുറത്തായത്.