പോൾവോൾട്ട് താരം ഡുപ്ലന്റിസും ഹർഡിൽസ് താരം വാർഹോമും 100 മീറ്റർ ഓട്ടമത്സരത്തിന്

സൂറിക് ∙ പോൾവോൾട്ടിൽ 9 തവണ ലോക റെക്കോർഡ് തിരുത്തിയ സ്വീ‍ഡന്റെ അർമാൻഡ് ഡുപ്ലന്റിസ്. 400 മീറ്റർ ഹർഡിൽസിലെ ലോക റെക്കോർഡ് വർഷങ്ങളായി കയ്യടക്കിവച്ചിരിക്കുന്ന നോർവേയുടെ കാർസ്റ്റൻ വാർഹോം. ട്രാക്കിലും ഫീൽഡിലുമായി അതിവേഗത്തിന് പേരുകേട്ട ഇവർ ഒന്നിച്ചോടിയാൽ ആരു ജയിക്കും ?

ആരാധകർ ആവേശത്തോടെ കാത്തിരിക്കുന്ന പ്രദർശന മത്സരത്തിനു സൂറിക്കിൽ അരങ്ങൊരുങ്ങുന്നു. സെപ്റ്റംബർ നാലിന് നടക്കുന്ന സൂറിക് ഡയമണ്ട് ലീഗിനോട് അനുബന്ധിച്ചാണ് വാർഹോമും ഡുപ്ലന്റിസും 100 മീറ്ററിൽ മത്സരിക്കുക.  പോൾവോൾട്ടിലും ഹർഡിൽസിലും അതിവേഗ കുതിപ്പിലൂടെ ശ്രദ്ധ നേടിയവരാണ് ഡുപ്ലന്റിസും വാർഹോമും. ഇരുവരും മുൻപ് 100 മീറ്ററിൽ മത്സരിച്ചിട്ടുമുണ്ട്.