ഏഷ്യൻ ജൂനിയർ വനിതാ ഹോക്കിയിൽ ഇന്ത്യ ഫൈനലിൽ; കലാശപ്പോരിൽ ഇന്ന് ചൈനയെ നേരിടും

മസ്കത്ത് ∙ ഏഷ്യൻ ജൂനിയർ വനിതാ ഹോക്കിയിൽ നിലവിലെ ചാംപ്യൻമാരായ ഇന്ത്യ ഫൈനലിൽ. സെമിയിൽ ജപ്പാനെ 3–1ന് തോൽപിച്ചായിരുന്നു ഇന്ത്യൻ വനിതകളുടെ മുന്നേറ്റം. ആദ്യ 13 മിനിറ്റിനിടെ 3 ഗോൾ നേടിയാണ് ഇന്ത്യ മത്സരത്തിൽ ആധിപത്യമുറപ്പിച്ചത്. നാലാം മിനിറ്റിൽ മുംതാസ് ഖാനും അഞ്ചാം മിനിറ്റിൽ സാക്ഷി റാണയും തുടങ്ങിവച്ച ഗോളടി 13–ാം മിനിറ്റിൽ ദീപിക പൂർത്തിയാക്കി. 23–ാം മിനിറ്റിൽ നികോ മയൂമ ജപ്പാന്റെ ആശ്വാസ ഗോൾ നേടി. 

ഇന്നു രാത്രി 8.30ന് നടക്കുന്ന ഫൈനലിൽ ചൈനയാണ് ഇന്ത്യയുടെ എതിരാളികൾ. സെമിയിൽ ചൈന കൊറിയയെ (4–1) തോൽപിച്ചു. കഴിഞ്ഞയാഴ്ച ജൂനിയർ ആൺകുട്ടികളുടെ ഏഷ്യ കപ്പ് കിരീടം സ്വന്തമാക്കിയ ഇന്ത്യ ഇരട്ടക്കിരീടമെന്ന ലക്ഷ്യവുമായാണ് ഇന്ന് ഇറങ്ങുക.