ദിവസവും തല കുളിക്കുന്നത് മുടിക്ക് നല്ലതാണോ ? ഹെയർ സ്റ്റൈലിസ്റ്റുകൾ പറയുന്നു

മുൻപൊക്കെ മുടിയെക്കുറിച്ച് എന്തു സംശയം വന്നാലും ഹെയർസ്റ്റൈലിസ്റ്റിനടുത്തേക്ക് ഓടുന്നവരായിരുന്നു പലരും. എന്നാൽ ലോക്‌ഡൗണും കോവിഡ് വ്യാപനഭീതിയും വന്നതോടെ പ്രിയപ്പെട്ട സ്റ്റൈലിസ്റ്റിന്റെ സേവനം പഴയപോലെ എളുപ്പത്തിൽ പലർക്കും ലഭിക്കുന്നില്ല. അതുകൊണ്ട്, മുടിയെ ആരോഗ്യത്തോടെ പരിപാലിക്കാൻ പറ്റിയ കുറച്ച് ടിപ്സ് പങ്കുവയ്ക്കുകയാണ് ഇവിടെ ചില ഹെയർസ്റ്റൈലിസ്റ്റുകൾ

കൃത്യമായ ഇടവേളകളിൽ മുടിയുടെ അറ്റം മുറിക്കാൻ മറക്കല്ലേ

മുടിക്കും മുഖത്തിനും ഇണങ്ങുന്ന വിധത്തിലുള്ള ഹെയർകട്ട് ചെയ്യണമെന്നും കൃത്യമായ ഇടവേളകളിൽ മുടിയുടെ അറ്റം മുറിക്കണമെന്നുമാണ് പ്രധാന നിർദേശം. ലുക്ക് നിലനിർത്താൻ മാത്രമല്ല ഇതെന്നും മുടിയുടെ ആരോഗ്യത്തിനുവേണ്ടിയാണിതെന്നും അവർ ഓർമപ്പെടുത്തുന്നു. ആറു മുതൽ എട്ട് വരെ ആഴ്ച കൂടുമ്പോൾ മുടിയുടെ അറ്റം മുറിച്ചു കൊടുക്കണം. മുടി നന്നായി നീളം വയ്ക്കണമെന്ന് ആഗ്രഹിക്കുന്നവർ ഒന്നോ രണ്ടോ ആഴ്ച കൂടി കൂടുതൽ കാത്തിരിക്കണം. ഷോർട്ട് ഹെയർ ഇഷ്ടപ്പെടുന്ന, മുടിയുടെ ലുക്ക് എപ്പോഴും നിലനിർത്തണമെന്ന് ആഗ്രഹിക്കുന്നവരെ സംബന്ധിച്ചിടത്തോളം ആറു മുതൽ എട്ട് വരെ ആഴ്ച ഇടവേളകളിൽ മുടിയുടെ അറ്റം മുറിക്കുന്നതാണ് നല്ലത്.

കൃത്യമായ ഉൽപന്നങ്ങൾ തിരഞ്ഞെടുക്കാൻ ശ്രദ്ധിക്കുക

മുടിയുടെ സ്വഭാവം തിരിച്ചറിഞ്ഞ് അതിനു ചേരുന്ന ഉൽപന്നങ്ങൾ തിരഞ്ഞെടുക്കാൻ ശ്രദ്ധിക്കണം. വരണ്ട, പാറിപ്പറന്ന മുടിയെ നിയന്ത്രണത്തിലാക്കാനും മുടിക്ക് തിളക്കം നൽകാനും പുറമേ പുരട്ടാവുന്ന ഗുണനിലവാരമുള്ള ഹെയർ സിറം തിരഞ്ഞെടുക്കാം. മുടി നന്നായിരിക്കാനും ടെക്സ്ചറും ഉള്ളും തോന്നിക്കാൻ ഹെയർ സ്പ്രേകൾ ഉപയോഗിക്കാം. നല്ല കട്ടിയുള്ള മുടിയെ വരുതിയിലാക്കാൻ ഹെയർ സ്മൂത്തനിങ് ക്രീമുകൾ ഉപയോഗിക്കാം.

ദിവസവും മുടി കഴുകണോ?

ദിവസവും മുടി കഴുകുന്നത് അത്ര നല്ലതല്ലെന്നാണ് ഹെയർസ്റ്റൈലിസ്റ്റുകളുടെ പക്ഷം. ഷാംപൂവിന്റെ തുടർച്ചയായുള്ള ഉപയോഗം തലമുടിയുടെ ആരോഗ്യത്തെ ബാധിക്കുകയും മുടിയിലെ എണ്ണമയം തീർത്തും ഇല്ലാതാക്കുകയും ചെയ്യുന്നു. മുടി കഴുകുന്നതിന്റെ ഇടവേളകൾ കൂടുന്തോറും ഉൽപന്നങ്ങൾ ഉപയോഗിക്കുന്നതും കുറയും. മുടി കഴുകുമ്പോൾ ശിരോചർമത്തിലെ പൊടിയുൾപ്പടെ നന്നായി കഴുകിക്കളഞ്ഞതിനു ശേഷം മാത്രം മുടിക്കായുള്ള ഉൽപന്നങ്ങൾ ഉപയോഗിക്കാൻ ശ്രദ്ധിക്കുക.

എന്നും ഒരേ ഹെയർസ്റ്റൈൽ ശീലിക്കല്ലേ

ഷാംപുവിന്റെയും മറ്റും ഉപയോഗം കുറയുമ്പോൾ മുടി സ്ഥിരമായി ഒരേ രീതിയിൽ കെട്ടിവയ്ക്കാൻ പലരും ശ്രമിക്കുന്നു. പോണിടെയിൽ പോലെയുള്ള ഹെയർസ്റ്റൈലുകൾ എന്നും ശീലിച്ചാൽ അതു മുടിയുടെ ടെക്സ്ച്ചറിനെ ബാധിക്കും. വലിച്ചുമുറുക്കി മുടി കെട്ടുന്നതുകൊണ്ടുള്ള അസ്വസ്ഥതകൾ വേറെയും. മുടിയുടെ നന്മയെക്കരുതി ഇടയ്ക്കെങ്കിലും ഹെയർസ്റ്റൈലുകൾ മാറി മാറി പരീക്ഷിക്കണം. ദിവസവും ഒരേ രീതിയിൽ കെട്ടിയാൽ മുടി പൊട്ടിപ്പോകാനും സാധ്യതയുണ്ട്.

മൃദുവായ തലയിണയുറകൾ ഉപയോഗിക്കണം

മുടിയുടെ ആരോഗ്യത്തിന് കൂടുതൽ ശ്രദ്ധനൽകുന്ന ആളാണ് നിങ്ങളെങ്കിൽ തീർച്ചയായും തലയിണ ഉറയുടെ കാര്യത്തിലും ശ്രദ്ധ വേണം. സാറ്റിൻ അല്ലെങ്കിൽ സിൽക്കുകൊണ്ടുള്ള തലയിണയുറകൾ ഉപയോഗിക്കുന്നത് മുടിയുടെ ആരോഗ്യത്തിന് നല്ലതാണ്. ഉറങ്ങുമ്പോൾ തലയിണയും മുടിയുമായി സമ്പർക്കമുണ്ടാകുമ്പോൾ വല്ലാതെ ഉരഞ്ഞ് മുടിക്ക് പൊട്ടൽ വരാതെ കാക്കാൻ മൃദുവായ തലയിണയുറകൾ സഹായിക്കും.