ഗുഡ് ബൈ ടു വാട്സാപ്; ഈ 'വാക്കുകൾ' ഉപയോഗിച്ചാൽ വാട്സാപ്പിൽ ഉടനടി നിരോധനം

‌ഓഫീസുകളിൽ മുതൽ കുടുംബങ്ങളിൽവരെ കൂട്ടായ്മകൾക്കായി ഒഴിവാക്കാനാവാത്ത മാർഗമായിരിക്കുകയാണ് വാട്സാപ്. ഏതൊരു പ്രവർത്തനങ്ങൾക്കും യാത്രകൾക്കും മുൻപും ആദ്യമായി ഉണ്ടാക്കുക ഒരു വാട്സാപ് ഗ്രൂപ്പാണ്. പക്ഷേ നമ്മുടെ കൈവശമുള്ള ഫോണിലല്ലേ എന്നു കരുതി പറയുന്ന ചില വാക്കുകളും ഉള്ളടക്കങ്ങളും വാട്സാപ്പിൽ നിരോധനം ലഭിക്കാനും ചിലപ്പോൾ നിയമ നടപടികൾക്കും കാരണമാകും.

ലോകത്ത് ഏറ്റവുമധികം ഉപയോഗിക്കുന്ന സന്ദേശമയയ്‌ക്കൽ പ്ലാറ്റ്‌ഫോമുകളിലൊന്നാണ് വാട്സാപ്. 2024 ജനുവരിയിൽ മാത്രം, 2 ബില്യൺ ആളുകൾ ഈ ആപ്ലിക്കേഷൻ ഉപയോഗിക്കുന്നുണ്ടെന്ന് കണക്കാക്കപ്പെടുന്നു. വാട്സാപ്പിൽ നിരോധനം ലഭിക്കാൻ പ്രത്യേക വാക്കുകളുപരി ഉള്ളടക്കമായിരിക്കും കാരണമാകുക. അക്കൗണ്ട് നിരോധിക്കുന്നതിന് കാരണമായേക്കാവുന്ന പ്രധാന ഉള്ളടക്കങ്ങളിതാ.

∙നിയമവിരുദ്ധമായ ഉള്ളടക്കം

നിയമവിരുദ്ധമോ അശ്ലീലമോ അപകീർത്തികരമോ ഭീഷണിപ്പെടുത്തുന്നതോ ആയ പ്രയോഗങ്ങൾ അടങ്ങിയ സന്ദേശങ്ങൾ അയയ്ക്കരുത്. വിദ്വേഷ പ്രസംഗം, ഗ്രാഫിക് അക്രമം, നിയമവിരുദ്ധ പ്രവർത്തനങ്ങൾ പ്രോത്സാഹിപ്പിക്കുന്ന ഏതൊരു ഉള്ളടക്കവും ഇതിൽ ഉൾപ്പെടുന്നു.

∙സ്‌പാം.

പ്രമോഷണൽ സന്ദേശങ്ങളോ സ്‌പാമോ അയയ്‌ക്കുന്നത് ഒഴിവാക്കുക. കോൺടാക്റ്റുകളിൽ നിങ്ങളുടെ നമ്പർ സേവ് ചെയ്യാത്ത ഉപയോക്താക്കൾക്ക് ബൾക്ക് മെസേജിങ് കർശനമായി നിരോധിച്ചിരിക്കുന്നു.

∙തെറ്റായ വിവരങ്ങൾ :

തെറ്റായ വിവരങ്ങൾ പങ്കിടുക, തെറ്റിദ്ധരിപ്പിക്കുന്ന പ്രസ്താവനകൾ ഇവ നിരോധനത്തിലേക്ക് നയിച്ചേക്കാം. വിവരങ്ങൾ കൈമാറുന്നതിന് മുമ്പ് എല്ലായ്പ്പോഴും അതിന്റെ കൃത്യത പരിശോധിക്കുക.

∙മാൽവെയർ:

മാൽവെയറോ വൈറസുകളോ അടങ്ങിയ ഫയലുകൾ അയയ്ക്കുന്നത് വാട്ട്‌സാപ്പിന്റെ നയങ്ങളുടെ നേരിട്ടുള്ള ലംഘനമാണ്. പങ്കിടുന്ന എല്ലാ ഫയലുകളും സുരക്ഷിതവും നിയമാനുസൃതവുമാണെന്ന് ഉറപ്പാക്കുക.

ഇത്തരം സന്ദേശങ്ങൾ ഉപയോഗിക്കുന്നത് വാട്സാപ് എങ്ങനെ അറിയും? 

ഒരു ഓട്ടോമേറ്റഡ് ഡാറ്റ പ്രോസസിങ് പ്രക്രിയയിലൂടെ, വാട്സാപ് ഒരു അവലോകന പ്രക്രിയ നടത്തുകയും തീരുമാനങ്ങൾ എടുക്കുകയും ചെയ്യുന്നുണ്ട്. പ്രധാനമായും മറ്റ് ഉപയോക്താക്കൾ നിങ്ങളെ എപ്പോഴെങ്കിലും റിപ്പോർട്ട് ചെയ്തിട്ടുണ്ടെങ്കിൽ ആയിരിക്കും ഇത്തരം നടപടികളിലൂടെ പോകും. സംശയം ജനിപ്പിക്കുന്നതും  എല്ലാറ്റിനുമുപരിയായി മറ്റുള്ളവരെ ദ്രോഹിക്കുന്നതും നിയമവിരുദ്ധവുമായ എന്തെങ്കിലും എഴുതുന്നതിന് മുമ്പ് രണ്ടുതവണ ചിന്തിക്കുക.