നോർക്ക അറ്റസ്റ്റേഷൻ: വ്യാജന്മാരെ കുരുക്കാൻ ഇനി ഹോളോഗ്രാമും ക്യുആർ കോഡും

വിദ്യാഭ്യാസ സർട്ടിഫിക്കറ്റുകളുടെ അറ്റസ്റ്റേഷനുമായി ബന്ധപ്പെട്ട തട്ടിപ്പുകൾക്കു പരിഹാരവുമായി നോർക്കയുടെ പുതിയ സംവിധാനം. സർട്ടിഫിക്കറ്റ് അറ്റസ്റ്റേഷൻ കൂടുതൽ സുരക്ഷിതമാക്കുന്നതിന്റെ ഭാഗമായി ഏപ്രിൽ 29 മുതൽ ഹോളോഗ്രാം, ക്യുആർ കോഡ് എന്നിവകൂടി ഉൾപ്പെടുത്താനാണ് നോർക്ക റൂട്സ് തീരുമാനിച്ചത്.

സർട്ടിഫിക്കറ്റുകളിലെ നോർക്ക റൂട്സിന്റെ അറ്റസ്റ്റേഷൻ സാധുത ക്യുആർ കോഡ് റീഡിങ് സഹായത്തോടെ പരിശോധിക്കാൻ ഇതുവഴി കഴിയും. നോർക്ക റൂട്സ് ഓഥന്റിക്കേഷൻ ഉദ്യോഗസ്ഥരുടെ ഒപ്പും സീലും വ്യാജമായി നിർമിച്ച് വിദ്യാഭ്യാസ സർട്ടിഫിക്കറ്റുകളിൽ കൃത്രിമം നടത്തുന്നതു ശ്രദ്ധയിൽപ്പെട്ടതിനെ തുടർന്നാണു പുതിയ തീരുമാനം.