അമൂല്യവസ്തുക്കളുടെ ശേഖരം; പഴമയുടെ തിളക്കവുമായി കോയിക്കൽ കൊട്ടാരം

വേണാട് രാജവംശത്തിന്‍റെ കരുത്തുറ്റ ഓര്‍മകള്‍ പേറി ഗാംഭീര്യത്തോടെ ആകാശത്തേക്ക് തലയുയര്‍ത്തി നില്‍ക്കുന്നു കോയിക്കല്‍ കൊട്ടാരം. അതിമനോഹരമായ വാസ്തുവിദ്യയും പുരാവസ്തുക്കളുടെ ആകർഷകമായ ശേഖരവും മനംമയക്കുന്ന പൂന്തോട്ടങ്ങളുമെല്ലാമായി ആരെയും ആകർഷിക്കും. കേരളത്തിന്‍റെ സമ്പന്നമായ സാംസ്കാരിക പൈതൃകത്തിന്‍റെ തിലകക്കുറിയാണ് ഈ കൊട്ടാരം എന്ന് പറയാം. തിരുവനന്തപുരത്തെത്തുന്ന ഓരോ സഞ്ചാരിയും നെടുമങ്ങാടുള്ള ഈ കൊട്ടാരം സന്ദര്‍ശിച്ചേ തിരിച്ചുപോകാവൂ.

 പതിനാറാം നൂറ്റാണ്ടിൽ വേണാട്ടിലെ രാജ്ഞിയായിരുന്ന ഉമയമ്മ റാണി, തന്‍റെ സഹോദരിക്ക് സമ്മാനമായി നിർമിച്ചതാണ് കോയിക്കൽ കൊട്ടാരം. പിന്നീട് പതിനെട്ടാം നൂറ്റാണ്ടിൽ തിരുവിതാംകൂർ രാജാവായിരുന്ന മാർത്താണ്ഡവർമ ഈ കൊട്ടാരം പുതുക്കിപ്പണിയുകയും വിപുലീകരിക്കുകയും ചെയ്തു. കേരളത്തിലെ രാജകുടുംബങ്ങളുടെ ജീവിതശൈലി, സംസ്കാരം, പാരമ്പര്യം എന്നിവയിലേക്കുള്ള നേർക്കാഴ്ച നല്‍കുന്ന ഈ കൊട്ടാരം ഇപ്പോൾ ഒരു മ്യൂസിയമാണ്.

 പുരാതന നാണയങ്ങൾ, ആയുധങ്ങൾ, സംഗീതോപകരണങ്ങൾ, പരമ്പരാഗത വീട്ടുപകരണങ്ങൾ എന്നിവയുൾപ്പെടെയുള്ള പുരാവസ്തുക്കളുടെ സമ്പന്നമായ ശേഖരം കൊട്ടാരത്തിലുണ്ട്. കൊട്ടാരത്തിന്‍റെ ചുവരുകളിലും മേൽക്കൂരകളിലും പരമ്പരാഗത കേരള ശൈലിയിലുള്ള സങ്കീർണമായ മരം കൊത്തുപണികളും ചുവർച്ചിത്രങ്ങളും കാണാം.

 നാടോടി കലകൾ, നൃത്തം, സംഗീതം, കരകൗശല വസ്തുക്കൾ എന്നിവയുടെ പ്രദർശനങ്ങളുള്ള ഫോക്ലോർ മ്യൂസിയമുണ്ട് ഇവിടെ. 1992 ൽ സ്ഥാപിതമായ ഫോക്ലോർ മ്യൂസിയത്തിൽ, കേരളത്തിലെ വിവിധ ഉത്സവങ്ങളിലും അനുഷ്ഠാനങ്ങളിലും ഉപയോഗിക്കുന്ന പരമ്പരാഗത വസ്ത്രങ്ങൾ, മുഖംമൂടികൾ, പാവകൾ, സംഗീതോപകരണങ്ങൾ എന്നിവയുടെ ശേഖരമുണ്ട്.

 ന്യൂമിസ്മാറ്റിക് മ്യൂസിയമാണ് മറ്റൊരു സവിശേഷത. ഇവിടെ അപൂർവ നാണയ ശേഖരം കാണാനും വിവിധ രാജ്യങ്ങളുമായുള്ള കേരളത്തിന്‍റെ മുൻകാല വ്യാപാര ബന്ധങ്ങളെക്കുറിച്ച് ഉൾക്കാഴ്ച നേടാനും കഴിയും. കേരളത്തിലെ ഏറ്റവും പഴയ നാണയങ്ങളായ ഒറ്റപുത്തൻ, ഇരട്ടപുത്തൻ, കലിയുഗരായൻ പണം തുടങ്ങിയവ ഇവിടെ കാണാം. യേശുക്രിസ്തുവിന് സമ്മാനിക്കപ്പെട്ടതെന്ന് കരുതുന്ന അമൈദ എന്ന അപൂർവ വെനീഷ്യന്‍ നാണയവും ഇവിടെയുണ്ട്. കൂടാതെ, 2500 വർഷം പഴക്കമുള്ള കർഷ നാണയങ്ങൾ, രാശി നാണയങ്ങൾ (ലോകത്തിലെ ഏറ്റവും ചെറുത്), റോമാ സാമ്രാജ്യത്തില്‍ നിന്നുള്ള  നാണയങ്ങൾ, ഇന്ത്യയിലുടനീളമുള്ള വിവിധ രാജവംശങ്ങൾ ഉപയോഗിച്ചിരുന്ന നാണയങ്ങൾ എന്നിവയും ഇവിടെ കാണാം. 

സന്ദർശകർക്ക് കൊട്ടാരം പൂന്തോട്ടങ്ങളിലൂടെ നടക്കാം. അത് വൈവിധ്യമാർന്ന അപൂർവ സസ്യങ്ങളുടെയും മരങ്ങളുടെയും ആവാസ കേന്ദ്രമാണ് ഇവിടം. 

തിരുവനന്തപുരത്ത് നിന്ന് ഏകദേശം 18 കിലോമീറ്റർ അകലെയാണ് കൊട്ടാരം സ്ഥിതി ചെയ്യുന്നത്, ടാക്സിയിലോ ബസിലോ എളുപ്പത്തിൽ എത്തിച്ചേരാം.

English Summary: Koyikkal Palace at Nedumangad in Thiruvananthapuram