ലക്ഷ്വറി യാത്രക്കാര്‍ക്കിടയില്‍ ഏറ്റവും കൂടുതല്‍ ഡിമാന്‍ഡുള്ള രാജ്യം

യാത്രകള്‍ക്ക് അല്‍പ്പം ആഡംബരമായിക്കോട്ടെ എന്നു ചിന്തിക്കുന്ന അമേരിക്കന്‍ അവധിക്കാല സഞ്ചാരികള്‍ക്കിടയില്‍ ഹിറ്റ്‌ ആയി കോസ്റ്റാറിക്ക.  '2024 ലെ ഡെസ്റ്റിനേഷൻ ഓഫ് ദ ഇയർ' എന്നാണ് പ്രശസ്ത ട്രാവല്‍ വെബ്സൈറ്റ് ആയ ട്രാവല്‍ പ്ലസ് ലെഷർ കോസ്റ്റാറിക്കയ്ക്കിട്ട ഓമനപ്പേര്. അതിമനോഹരമായ ബീച്ചുകളും സമൃദ്ധമായ മഴക്കാടുകളും വ്യത്യസ്തമായ ജീവിതശൈലിയുമുള്ള മധ്യ അമേരിക്കന്‍ രാഷ്ട്രമായ കോസ്റ്റാറിക്ക പണ്ട് മുതല്‍ക്കേ സഞ്ചാരികള്‍ക്കിടയില്‍ ജനപ്രിയമാണ്.

ഈ മേയ് മാസം വരെ ഗൂഗിളില്‍ ആളുകള്‍ തിരഞ്ഞ ആഡംബര ലൊക്കേഷനുകളുടെ ഡാറ്റ പ്രകാരമാണ് കണ്ടെത്തല്‍. കഴിഞ്ഞ 12 മാസത്തെ ശരാശരി പ്രതിമാസ തിരയൽ അളവ് നിർണ്ണയിക്കാൻ ഗൂഗിള്‍ കീവേഡ് പ്ലാനർ ഉപയോഗിച്ച് ഏത് ലക്ഷ്യസ്ഥാനങ്ങളാണ് റാങ്ക് ചെയ്യുന്നതെന്നു കണ്ടെത്തി. ഈ ഡാറ്റയില്‍ ഏറ്റവും  ഡിമാൻഡുള്ള സ്ഥലം കോസ്റ്റാറിക്കയെന്നു കണ്ടു.

കോസ്റ്റാറിക്കയുടെ ശരാശരി പ്രതിമാസ സേർച്ച് വോളിയം 34,248 ആണ്. ഇതില്‍ ഏറ്റവും കൂടുതല്‍ തിരയലുകള്‍ വന്നത് കലിഫോർണിയയിൽ നിന്നാണ്, 4,712.50 തിരയലുകൾ. കൂടാതെ, ഫ്ലോറിഡ 2,984.17, ടെക്സാസ് 2,660.83 എന്നിവയും മുന്നിട്ടു നില്‍ക്കുന്നു. 

പ്രതിമാസ ശരാശരി 32,278 തിരയൽ വോളിയവുമായി കോസ്റ്റാറിക്കയ്ക്ക് തൊട്ടുപിന്നാലെ ഹവായ് രണ്ടാം സ്ഥാനത്തെത്തി, 20 സംസ്ഥാനങ്ങളിൽ ഏറ്റവും കൂടുതൽ തിരഞ്ഞ ലക്ഷ്വറി വെക്കേഷൻ ലൊക്കേഷനായിരുന്നു ഹവായ്. വാഷിങ്ടണിൽ നിന്നാണ് ഏറ്റവും കൂടുതൽ തിരയലുകൾ വന്നത്. 

യുഎസിൽ 27,331 ശരാശരി പ്രതിമാസ തിരയലുകളോടെ ബാലി മൂന്നാം സ്ഥാനത്തെത്തി, ഏറ്റവും കൂടുതൽ തിരയലുകൾ ടെക്‌സാസിൽ നിന്നാണ്. നാലാമതായി മാലദ്വീപ് ആണ്. തായ്‌ലൻഡ്, ന്യൂയോർക്ക് സിറ്റി, പാരീസ്, ദുബായ്, ലൊസാഞ്ചലസ്, ഫിജി എന്നിവ ആദ്യ 10 സ്ഥാനങ്ങളിൽ എത്തി.

സ്പാനിഷ്‌ വാക്കായ 'കോസ്റ്റ റിക്ക'യുടെ അർത്ഥം സമ്പന്ന തീരം എന്നാണ്‌. ഈ രാജ്യം ശാന്ത സമുദ്രത്തിനും കരീബിയൻ കടലിനുമിടയ്ക്കു സ്ഥിതിചെയ്യുന്നു. വടക്ക് നിക്കരാഗ്വ, കിഴക്കും തെക്കും പനാമ, പടിഞ്ഞാറും തെക്കും ശാന്തസമുദ്രം, കിഴക്ക് കരീബിയൻ കടൽ എന്നിവയുമായി അതിർത്തി പങ്കിടുന്നു. സാൻ ഹോസെ ആണ് തലസ്ഥാനം. 

ലോകത്തിലെ ഏറ്റവും പ്രശസ്തമായ വിനോദസഞ്ചാര കേന്ദ്രങ്ങളിലൊന്നാണ് കോസ്റ്റാറിക്ക. വര്‍ഷം തോറും ഏകദേശം രണ്ടു ബില്ല്യന്‍ ഡോളര്‍ വരുമാനമാണ് ടൂറിസം കൊണ്ടുവരുന്നത്. സമ്പന്നമായ ജൈവവൈവിധ്യം, വിശാലമായ സംരക്ഷിത ഇടങ്ങൾ, ചൂടുള്ള കാലാവസ്ഥ എന്നിവയ്ക്ക് പേരുകേട്ടതാണ് കോസ്റ്റാറിക്ക. ഇടതൂർന്ന കാടുകൾ, സജീവമായ അഗ്നിപർവ്വതങ്ങൾ, ഒഴുകുന്ന നദികൾ, മനോഹരമായ വെള്ളച്ചാട്ടങ്ങൾ എന്നിവയെല്ലാം ഇവിടെയുണ്ട്. 

വടക്കുപടിഞ്ഞാറൻ നിക്കോയ പെനിൻസുലയുടെ വലിയൊരു ഭാഗം ലോകത്തിലെ അഞ്ച് "നീല മേഖലകളിൽ" ഒന്നായി പ്രഖ്യാപിക്കപ്പെട്ടിരിക്കുന്നു. അസാധാരണമായ ദീർഘായുസ്സ് നിരക്കുള്ള ഈ മേഖലയില്‍ ആളുകൾ 100 വയസ്സ് വരെ ജീവിക്കുന്നു. പലപ്പോഴും ലോകത്തിലെ ഏറ്റവും സന്തോഷമുള്ള രാജ്യങ്ങളുടെ പട്ടികയില്‍ മുന്നിലാണ് കോസ്റ്റാറിക്കയുടെ സ്ഥാനം. "പുര വിദ" അഥവാ "ശുദ്ധമായ ജീവിതം" എന്നതാണ് ഇവിടുത്തെ ജനങ്ങളുടെ ദേശീയ മുദ്രാവാക്യം.

ലോകത്തിലെ ജൈവവൈവിധ്യത്തിന്റെ 5% കോസ്റ്റാറിക്കയിലുണ്ട്. കോസ്റ്റാറിക്കയുടെ ഏകദേശം 25% ദേശീയ ഉദ്യാനങ്ങളുടെയും സ്വകാര്യ റിസർവുകളുടെയും രൂപത്തിൽ പ്രകൃതി സംരക്ഷണത്തിനായി നീക്കിവച്ചിരിക്കുന്നു. ഇവിടുത്തെ ഏറ്റവും പ്രശസ്തമായ ദേശീയ ഉദ്യാനങ്ങളിൽ ഒന്നാണ് മാനുവൽ അന്റോണിയോ. തെക്കുപടിഞ്ഞാറൻ ഭാഗത്തുള്ള കോർകോവാഡോ നാഷണൽ പാർക്ക് പലപ്പോഴും 'കോസ്റ്റാറിക്കയുടെ പാർക്ക് സിസ്റ്റത്തിന്റെ കിരീടം' എന്നു വിളിക്കപ്പെടുന്നു. ബോട്ടിലോ വിമാനത്തിലോ മാത്രം എത്തിച്ചേരാവുന്ന ചതുപ്പുകൾ, കാടുകൾ, നദികൾ എന്നിവ നിറഞ്ഞ വിശാലമായ ഭൂമിയാണ് ടോർട്ടുഗ്യൂറോ നാഷണൽ പാർക്ക്. കടലാമകൾ വിരിഞ്ഞ് കടലിലേക്ക് നീങ്ങുന്നതു കാണാൻ ലോകത്തിലെ ഏറ്റവും മികച്ച സ്ഥലങ്ങളിൽ ഒന്നാണിത്.

വൈറ്റ്‌വാട്ടർ റാഫ്റ്റിങ്, കയാക്കിങ്, സ്‌കൂബ ഡൈവിങ്, സ്‌നോർക്കലിങ് തുടങ്ങിയ കായികവിനോദങ്ങള്‍ക്കും ഇവിടം ജനപ്രിയമാണ്.