നീലക്കുറിഞ്ഞിക്ക് ഇനി 6 വർഷം; ഇപ്പോൾ വന്നാൽ കൽക്കുറിഞ്ഞി കാണാം

നീലക്കുറിഞ്ഞി പൂവിടുന്നത് കാണാൻ ഇനി 6 വർഷം കൂടി കാത്തിരിക്കണം. ഇപ്പോൾ മൂന്നാറിൽ വന്നാൽ കൽക്കുറിഞ്ഞി പൂവിട്ടു നിൽക്കുന്നതു കാണാം. 8 വർഷത്തിലൊരിക്കലാണ് കൽക്കുറിഞ്ഞി പൂക്കുന്നത്.

നീലക്കുറിഞ്ഞി വിഭാഗത്തിൽപെട്ട കൽക്കുറിഞ്ഞിയുടെ ശാസ്ത്രനാമം ‘സ്ട്രോബിലാന്തസ് ഫോലോസ്’ എന്നാണ്. ഇരവികുളം ദേശീയോദ്യാനത്തിലെ രാജമല, കന്നിമല എന്നിവിടങ്ങളിലും പഴയ മൂന്നാർ ഹെഡ് വർക്സ് ഡാം മുതൽ പള്ളിവാസൽ വരെയുള്ള ദേശീയ പാതയോരത്തുമാണു കൽക്കുറിഞ്ഞി പൂത്തുനിൽക്കുന്നത്. ചോലവന മേഖലകളിലാണു കൽക്കുറിഞ്ഞി വളരുന്നത്.

മൂന്നാറിൽ 12 വർഷത്തിലൊരിക്കൽ പൂക്കുന്നത് ‘സ്ട്രോബിലാന്തസ് കുന്തിയാനസ്’ എന്ന ഇനം നീലക്കുറിഞ്ഞിയാണ്. 2030 ൽ ആണ് അടുത്ത സീസൺ. വർഷംതോറും പൂക്കുന്നതു മുതൽ 20 വർഷത്തിൽ ഒരിക്കൽ പൂക്കുന്നതുവരെ 47 ഇനം നീലക്കുറിഞ്ഞികളാണു മൂന്നാർ മേഖലയിലുള്ളത്.