കുവൈത്തിൽ യുവാവിന്റെ കൊലപാതകം: രാജകുടുംബാംഗത്തിന് വധശിക്ഷ

കുവൈത്ത് സിറ്റി ∙ കുവൈത്തിൽ സ്വദേശി യുവാവ് അബ്ദുല്‍ അസീസ് അല്‍സഅ്തരിയെ കൊലപ്പെടുത്തിയ കേസിൽ രാജകുടുംബാംഗത്തിന് വിചാരണ കോടതി വിധിച്ച ശിക്ഷ രാജ്യത്തെ പരമോന്നത കോടതി ശരിവെച്ചു.

സ്വന്തം വീടിനു മുന്നില്‍ വെച്ച് യന്ത്രത്തോക്ക് ഉപയോഗിച്ച് വെടിവെച്ചു കൊലപ്പെടുത്തിയ ഷെയ്ഖ് സ്വബാഹ് സാലിം അല്‍സ്വബാഹിനാണ് കോടതി വധശിക്ഷ വിധിച്ചത്. വിചാരണ കോടതി വിധിച്ച വധശിക്ഷ നേരത്തെ അപ്പീല്‍ കോടതി ശരിവെച്ചിരുന്നു. 

കഴിഞ്ഞ ഏപ്രില്‍ മാസത്തിലാണ് കേസിനാസ്പദമായ സംഭവം. സ്വന്തം വീടിനു മുന്നില്‍ വെച്ച് അബ്ദുല്‍ അസീസ് അല്‍സഅ്തരിയെ പ്രതി യന്ത്രത്തോക്ക് ഉപയോഗിച്ച് വെടിവെച്ചു കൊലപ്പെടുത്തുകയായിരുന്നു. യുവാവിന് പന്ത്രണ്ടു തവണ വെടിയേറ്റിരുന്നു. തിരിച്ചറിയപ്പെടാതിരിക്കാന്‍ ഹെല്‍മെറ്റ് ധരിച്ചെത്തിയാണ് പ്രതി കുറ്റകൃത്യം നടത്തിയത്.

കൃത്യത്തിനു ശേഷം പ്രതി സംഭവസ്ഥലത്തു നിന്ന് രക്ഷപ്പെടുകയും ചെയ്തു. എന്നാല്‍, വൈകാതെ പ്രതിയെ തിരിച്ചറിഞ്ഞ് അറസ്റ്റ് ചെയ്യാനും കൃത്യത്തിന് ഉപയോഗിച്ച തോക്ക് കസ്റ്റഡിയിലെടുക്കാനും സുരക്ഷാ വകുപ്പുകള്‍ക്ക് സാധിച്ചു. അന്വേഷണം പൂര്‍ത്തിയാക്കിയ സുരക്ഷാ വകുപ്പുകള്‍ നിയമ നടപടികള്‍ക്ക് കേസ് പിന്നീട് പബ്ലിക് പ്രോസിക്യൂഷന് കൈമാറുകയായിരുന്നു.