ഓസ്ട്രേലിയ വിദ്യാർഥി വീസ ഫീസ് ഇരട്ടിയാക്കിയതിൽ ഇടപെട്ടതായി കേന്ദ്രം

ന്യൂഡൽഹി ∙ രാജ്യാന്തര വിദ്യാർഥികൾക്കുള്ള വീസ ഫീസ് ഓസ്ട്രേലിയ ഇരട്ടിയാക്കിയെന്നും വിഷയത്തിൽ ഇന്ത്യൻ സർക്കാർ ഇടപെട്ടിട്ടുണ്ടെന്നും വിദേശകാര്യ മന്ത്രാലയം അറിയിച്ചു. നേരത്തെ 710 ഓസ്ട്രേലിയൻ ഡോളറായിരുന്നത് (ഏകദേശം 39,000 രൂപ) ജൂലൈ 1 മുതൽ 1600 ഡോളർ (87890 രൂപ) ആക്കിയിരുന്നു. 

ഇതു പല വിദ്യാർഥികൾക്കും വെല്ലുവിളിയായെന്നും ഇതുൾപ്പെടെയുള്ള വിദ്യാർഥികളുടെ വിഷയങ്ങൾ ബന്ധപ്പെട്ട ഓസ്ട്രേലിയൻ അധികൃതരുടെ മുന്നിൽ അവതരിപ്പിച്ചിട്ടുണ്ടെന്നും വിദേശകാര്യ സഹമന്ത്രി കീർത്തി വർധൻ സിങ് രാജ്യസഭയിൽ ചോദ്യത്തിനു മറുപടിയായി പറഞ്ഞു.