മാപ്പിന്റെ കാര്യത്തില്‍ ബൈഡന്‍ ഒറ്റയ്ക്കല്ല; മുന്‍ഗാമികളില്‍ ലിങ്കണ്‍ മുതല്‍ ട്രംപ് വരെ

ഹൂസ്റ്റണ്‍ ∙  മകന് മാപ്പ് നല്‍കിയ യുഎസ് പ്രസിഡന്‍റ് ജോ ബൈഡന്‍റെ നടപടി യുഎസില്‍ പുതിയ ചര്‍ച്ചയ്ക്ക് വഴി തെളിച്ചിരിക്കുകയാണ്. ജനാധിപത്യത്തിന്‍റെ ധ്വംസനം എന്നാണ് നിയുക്ത പ്രസിഡന്‍റ് ഡോണൾഡ് ട്രംപ് ഇതിനോട് പതികരിച്ചത്. ക്രിമിനല്‍ കുറ്റങ്ങൾ നേരിടുന്ന മകൻ ഹണ്ടറിനായുള്ള ബൈഡന്‍റെ നീക്കം സമാനതകളില്ലാത്ത ജനാധിപത്യ ധ്വംസനം ആണെന്ന് വിമർശനം വ്യാപകമാണ്.

മകന് എതിരെയുള്ള നിയമ പ്രശ്നങ്ങളിൽ ഇടപെടില്ലെന്ന വാഗ്ദാനം ലംഘിച്ചുകൊണ്ടാണ് ബൈഡന്‍റെ മാപ്പ്. എന്നാല്‍ ഈ വിവാദപരമായ അധികാരം ഉപയോഗിക്കുന്ന ആദ്യത്തെയാളല്ല അദ്ദേഹം. ലഹരിമരുന്നുമായി ബന്ധപ്പെട്ട കുറ്റങ്ങള്‍ക്ക് ബില്‍ ക്ലിന്‍റണ്‍ തന്‍റെ അര്‍ദ്ധസഹോദരന്‍ റോജറിന് മാപ്പ് നല്‍കിയത് മുതല്‍ മരുമകന്‍റെ പിതാവ് ചാള്‍സ് കുഷ്നറിനോട് ഡോണൾഡ് ട്രംപിന്‍റെ വിവാദപരമായ മാപ്പ് വരെ നീളുന്ന പട്ടിക ബൈഡന് മുന്നിലുണ്ട്. 

∙ ജോ ബൈഡനും മകനും
47-ാമത് പ്രസിഡന്‍റ് തിരഞ്ഞെടുപ്പില്‍ വിജയിച്ച് ഡോണൾഡ് ട്രംപ് വൈറ്റ് ഹൗസിലേക്ക് മടങ്ങിവരുന്നതിന് ഏതാനും ആഴ്ചകള്‍ക്ക് മുൻപ്, പ്രസിഡന്‍റ് ജോ ബൈഡന്‍ ഡിസംബര്‍ 1 ന്  മകന്‍റെ നിയമ പ്രശ്നങ്ങള്‍ രാഷ്ട്രീയ എതിരാളികളുടെ നീക്കത്തിന്‍റെ ഫലമാണെന്ന് പ്രസ്താവനയിലൂടെ അവകാശപ്പെട്ടു. കോണ്‍ഗ്രസില്‍, തന്നെ തുരങ്കം വയ്ക്കാനും തന്‍റെ പ്രസിഡന്‍റ് സ്ഥാനത്തെ എതിര്‍ക്കാനുമുള്ള തന്ത്രമായി കേസുകള്‍ ഉപയോഗിച്ചുവെന്നാണ് അദ്ദേഹത്തിന്‍റെ വാദം.

'ഹണ്ടറുടെ കേസുകളുടെ വസ്തുതകള്‍ പരിശോധിക്കുന്ന ഒരു ന്യായബോധമുള്ള വ്യക്തിക്കും മറ്റൊരു നിഗമനത്തിലെത്താന്‍ കഴിയില്ല. അവന്‍ എന്‍റെ മകനായതുകൊണ്ട് മാത്രമാണ് വേട്ടയാടപ്പെട്ടത്.'- അദ്ദേഹം അവകാശപ്പെട്ടു. ഹണ്ടര്‍ ബൈഡന്‍റെ ബിസിനസ് ഇടപാടുകള്‍ പിതാവുമായി ബന്ധിപ്പിക്കാന്‍ റിപ്പബ്ലിക്കന്‍മാര്‍ വളരെക്കാലമായി ശ്രമിച്ചിരുന്നു. 'ഒരു പിതാവും പ്രസിഡന്‍റും ഈ തീരുമാനത്തിലേക്ക് വരുന്നത് എന്തുകൊണ്ടാണെന്ന് അമേരിക്കക്കാര്‍ക്ക് മനസ്സിലാകുമെന്ന് ഞാന്‍ പ്രതീക്ഷിക്കുന്നു' എന്നായിരുന്നു ബൈഡന്‍റെ പ്രഖ്യാപനം.

∙  ഡോണൾഡ് ട്രംപിന്‍റെ ‘വിവാദ മാപ്പ്’ 
അഴിമതി, നികുതി വെട്ടിപ്പ്, നിയമവിരുദ്ധ പ്രചാരണ സംഭാവനകള്‍ എന്നിവയ്ക്ക് സാക്ഷിയായി വര്‍ഷങ്ങള്‍ക്ക് മുമ്പ് കുഷ്നര്‍ കുറ്റസമ്മതം നടത്തിയതിന് ശേഷം, നിയുക്ത പ്രസിഡന്‍റ് ഡോണൾഡ് ട്രംപ് 2020-ല്‍ ചാള്‍സ് കുഷ്നര്‍ക്ക് മാപ്പ് നല്‍കി. റിയല്‍ എസ്റ്റേറ്റ് ബന്ധങ്ങളില്‍ നിന്ന് ട്രംപുമായി അടുത്ത ബന്ധമുള്ള കുഷ്നറെ ട്രംപ് ഫ്രാന്‍സിലെ യുഎസ് അംബാസഡര്‍ സ്ഥാനത്തേക്ക് പരിഗണിക്കുന്നുമുണ്ട്. ട്രംപിന്‍റെ മകള്‍ ഇവാങ്ക 2009-ല്‍ കുഷ്നറുടെ മകന്‍ ജാരെഡിനെ വിവാഹം കഴിച്ചതിനാല്‍ രണ്ട് കുടുംബങ്ങളും വ്യക്തിപരമായ ബന്ധം പങ്കിടുന്നവരാണ്. ട്രൂത്ത് സോഷ്യലില്‍ ഒരു പ്രഖ്യാപനം നടത്തുമ്പോള്‍, 'ഒരു മികച്ച ബിസിനസ്സ് നേതാവ്, മനുഷ്യസ്നേഹി, ഡീല്‍ മേക്കര്‍' എന്നൊക്കെയാണ് കുഷ്നറെ പ്രശംസിക്കുന്നത്. 

∙ ബില്‍ ക്ലിന്‍റനും അർധസഹോദരനും
2001 ലെ തന്‍റെ അവസാന ദിവസം, പ്രസിഡന്‍റ് ബില്‍ ക്ലിന്‍റണ്‍ ലഹരിമരുന്നുമായി ബന്ധപ്പെട്ട കുറ്റത്തിന് 1985 ല്‍ ശിക്ഷിക്കപ്പെട്ട അർധസഹോദരന്‍ റോജര്‍ ക്ലിന്‍റന് മാപ്പ് നല്‍കി. ഗൂഢാലോചന കുറ്റം സമ്മതിച്ച് റോജര്‍ ഒരു വര്‍ഷത്തിലേറെ തടവ് അനുഭവിച്ചിട്ടുണ്ട്. ഈ സമയത്ത്, വിദേശ സ്രോതസ്സുകളില്‍ നിന്ന് വലിയ തുക കൈപ്പറ്റിയതിന് അദ്ദേഹത്തെ അന്വേഷിച്ച കോണ്‍ഗ്രസിലെ റിപ്പബ്ലിക്കന്‍മാരുടെ പരിശോധനയും അദ്ദേഹം നേരിട്ടു.

∙ ജിമ്മി കാര്‍ട്ടറുടെ സഹോദരന്‍
സാമ്പത്തിക പ്രശ്നങ്ങള്‍ അഭിമുഖീകരിക്കുകയും മദ്യപാനാസക്തി നേരിടുകയും ചെയ്ത ബില്ലി കാര്‍ട്ടര്‍, ലാഭത്തിന്‍റെ പകുതി നേടാമെന്ന പ്രതീക്ഷയില്‍ ലിബിയയുമായി ബിസിനസ് ഇടപാടുകള്‍ നടത്താന്‍ ശ്രമിച്ചു. എന്നിരുന്നാലും, ജിമ്മി കാര്‍ട്ടര്‍ തിരഞ്ഞെടുപ്പില്‍ തോല്‍ക്കുന്നതിന് തൊട്ടുമുൻപ്, 1980 ഒക്ടോബറില്‍ സെനറ്റ് ജുഡീഷ്യറി സബ്കമ്മിറ്റി ബില്ലി യു.എസ് നയത്തെ ബാധിക്കുന്ന തരത്തില്‍ പ്രവര്‍ത്തിച്ചില്ല എന്നു വിധിച്ചു. പ്രസിഡന്‍റ് കാര്‍ട്ടര്‍ തന്‍റെ സഹോദരനെ പരസ്യമായി പ്രതിരോധിച്ചില്ലെങ്കിലും, രാഷ്ട്രീയ നാശനഷ്ടങ്ങള്‍ കുറയ്ക്കാന്‍ മാപ്പ് അനുവദിച്ചു.

∙ ഏബ്രഹാം ലിങ്കണ്‍
ഹെല്‍മിന്‍റെ ഭാര്യയും മേരി ടോഡ് ലിങ്കണിന്‍റെ അർധസഹോദരിയുമായ എമിലി ടോഡ് ഹെല്‍ം എന്നിവരുള്‍പ്പെടെ നിരവധി വ്യക്തികള്‍ക്ക് ലിങ്കണ്‍ മാപ്പ് നല്‍കിയതും ചരിത്രത്തിന്‍റെ ഭാഗമാണ്.