8,601 വജ്രങ്ങൾ കൊണ്ട് അലങ്കരിച്ച 'തലയോട്ടി'; 130 കോടി രൂപ വിലയുള്ള സ്‌കൾ ആർട്ട്

ഇംഗ്ലിഷ് ആർട്ടിസ്റ്റും ആർട്ട് കളക്ടറുമായ ഡാമിയൻ ഹിർസ്റ്റ് 2007-ൽ നിർമ്മിച്ച ഒരു ശിൽപമാണ് 'ഫോർ ദ ലവ് ഓഫ് ഗോഡ്'. 18-ാം നൂറ്റാണ്ടിലെ മനുഷ്യ തലയോട്ടിയിൽ പ്ലാറ്റിനം കാസ്റ്റ് തീർത്ത് കുറ്റമറ്റ 8,601 വജ്രങ്ങൾ കൊണ്ടു പൊതിഞ്ഞ രൂപത്തിലാണ് ഈ സ്‌കൾ ആർട്ട് ഉള്ളത്. നിർമ്മിക്കാൻ 12 മില്യൺ പൗണ്ട് (130 കോടി രൂപ) ചെലവായ ഈ ശിൽപത്തിനായി ലണ്ടനിലെ ഒരു കടയിൽ നിന്ന് വാങ്ങിയ മനുഷ്യന്റെ തലയോട്ടിയാണ് ഡാമിയൻ ഹിർസ്റ്റ് സൃഷ്ടിയുടെ അടിസ്ഥാനമായി ഉപയോഗിച്ചിരിക്കുന്നത്.

മരണത്തെയും ജീവിതത്തിന്റെ സൗന്ദര്യത്തെയും വിലയെയും ഓർമ്മിപ്പിക്കുന്ന 'ഫോർ ദ ലവ് ഓഫ് ഗോഡിൽ', ചെറിയ 8,600 വജ്രങ്ങള്‍ക്കൊപ്പം 'സ്‌കൾ സ്റ്റാർ ഡയമണ്ട്' എന്നറിയപ്പെടുന്ന ഒരു പിയർ ആകൃതിയിലുള്ള വലിയ ഡയമണ്ടുമുണ്ട്. പ്രധാന ശ്രദ്ധാകേന്ദ്രമായി തലയോട്ടിയുടെ നെറ്റിയിലാണ് ഈ ഡയമണ്ട് ഉറപ്പിച്ചിരിക്കുന്നത്. താൻ കുട്ടിയായിരുന്നപ്പോൾ കുസൃതി കാട്ടുന്ന സമയം അമ്മ ഉപയോഗിക്കുമായിരുന്ന 'ഫോർ ദ ലവ് ഓഫ് ഗോഡ്, വാട്ട് ആർ യു ഗോയിങ് ടു ഡു നെക്സ്റ്റ്?' എന്ന പ്രയോഗത്തിൽ നിന്നാണ് ഈ ശിൽപ്പത്തിന്റെ പേര് പ്രചോദനം ഉൾക്കൊണ്ടതെന്ന് ഡാമിയൻ പറയുന്നു. 

ലണ്ടനിൽ നിന്ന് വാങ്ങിയ തലയോട്ടിയുടെ പല്ലുകൾ യഥാർഥമാണ്. തലയോട്ടി 18-ാം നൂറ്റാണ്ടിൽ ജീവിച്ചിരുന്ന 35 വയസ്സുള്ള ഒരു യൂറോപ്യന്റേതാണെന്ന് കരുതപ്പെടുന്നു. 2007-ൽ ലണ്ടനിലെ വൈറ്റ് ക്യൂബ് ഗാലറിയിൽ ബിയോണ്ട് ബിലീഫ് എന്ന എക്സിബിഷനിലാണ് 'ഫോർ ദ ലവ് ഓഫ് ഗോഡ്' ആദ്യമായി പ്രദർശിപ്പിച്ചത്. 50 മില്യൺ പൗണ്ടിന് ഈ കലാസൃഷ്ടി വിറ്റതായി ഡാമിയൻ അവകാശപ്പെട്ടു. ജീവിച്ചിരിക്കുന്ന ഒരു കലാകാരന്റെ ഒരു സൃഷ്ടിക്ക് ഇതുവരെ നൽകുന്ന ഏറ്റവും ഉയർന്ന വിലയായിരുന്നു ഇത്. എന്നാൽ പേപ്പർ ട്രയൽ ഒന്നും അവശേഷിപ്പിക്കാതെ മുഴുവൻ പണമായി വാങ്ങിയെന്ന് പറയപ്പെടുന്ന ഈ ഡയമണ്ട് തലയോട്ടിയുടെ "വിൽപ്പന" വെറുമൊരു മാധ്യമ സ്റ്റൻഡ് ആണെന്നും ചിലർ വാദിച്ചു.

വിവാദങ്ങൾക്കിടയിലും 2008 നവംബർ-ഡിസംബർ മാസങ്ങളിൽ, നെതർലാൻഡ്‌സിലെ ആംസ്റ്റർഡാമിലെ ചരിത്രപ്രസിദ്ധമായ റിക്‌സ് മ്യൂസിയത്തിൽ ഈ സൃഷ്ടി പ്രദർശിപ്പിച്ചു. ഫ്ലോറൻസ്, ഇറ്റലി, ലണ്ടൻ, ഖത്തർ എന്നിവിടങ്ങളിലും അവസാനമായി 2024ൽ ജർമ്മനിയിലെ മ്യൂണിക്കിലെ മ്യൂസിയത്തിലും ഇത് പ്രദർശിപ്പിക്കുകയുണ്ടായി. ഡാമിയന്റെ തിരഞ്ഞെടുത്ത പെയിന്റിംഗുകളും പ്രദർശനത്തിനുണ്ടായിരുന്നു.