എന്തൊരു തിരിച്ചുവരവ്: നവ്യയെ പ്രശംസിച്ച് ഭാവന

ഒരുത്തീയിലെ നവ്യ നായരുടെ പ്രകടനത്തെ അഭിനന്ദിച്ച് നടി ഭാവന. പത്തു വർഷത്തിനു ശേഷം നവ്യയെ വീണ്ടും വെള്ളിത്തിരയിൽ കണ്ടതിന്റ ആഹ്ലാദവും ആവേശവും പ്രതിഫലിക്കുന്നതായിരുന്നു ഭാവനയുടെ വാക്കുകൾ. '10 വർഷത്തിനു ശേഷം നവ്യ ബിഗ് സ്ക്രീനിൽ! എന്തൊരു തിരിച്ചു വരവാണ്!,' ഭാവന കുറിച്ചു. 

ഭാവനയുടെ വാക്കുകൾ: "കഴിഞ്ഞ രാത്രി ഞാൻ ഒരുത്തീ കണ്ടു. എനിക്ക് വിവരിക്കാൻ വാക്കുകൾ കിട്ടുന്നില്ല. അതൊരു ത്രില്ലിങ് അനുഭവമായിരുന്നു. ആവേശം കൊണ്ട് സീറ്റിന്റെ അറ്റത്തിരുന്നാണ് ഞാൻ സിനിമ കണ്ടു തീർത്തത്. 10 വർഷത്തിനു ശേഷം നവ്യ ബിഗ് സ്ക്രീനിൽ! എന്തൊരു തിരിച്ചു വരവാണ്! നമുക്കുള്ള ഗംഭീര അഭിനേതാക്കളിൽ ഒരാളാണ് നവ്യ എന്നതിൽ തർക്കമില്ല. രാധാമണിയായി നവ്യ നടത്തുന്ന പകർന്നാട്ടം തന്നെയാണ് സിനിമയുടെ ആകർഷണം. വിനായകനും സൈജു കുറുപ്പും ആദിത്യനും അവരുടെ പ്രകടനം ഗംഭീരമാക്കി."

ഒരുത്തീ കണ്ടതിനു ശേഷമുള്ള ഭാവനയുടെ പ്രതികരണം നവ്യ നായരും സ്വന്തം സോഷ്യൽ മീഡിയ പേജിൽ പങ്കുവച്ചിരുന്നു. ഭാവനയുടെ അഭിനന്ദനങ്ങൾക്ക് നന്ദി അറിയിച്ച നവ്യ, ഭാവനയുടെ തിരിച്ചു വരവിന് താനും കാത്തിരിക്കുകയാണെന്ന് കുറിച്ചു. ഇരുതാരങ്ങളുടെയും ഈ സൗഹൃദസംഭാഷണം ആരാധകർ ഏറ്റെടുത്തു.