‘ഗോള്‍ഡ്’ വര്‍ക്ക് ആയില്ല, പക്ഷേ ഞങ്ങള്‍ക്ക് ലാഭമായിരുന്നു: പൃഥ്വിരാജ്
Mail This Article
ഗോള്‍ഡിന്റെ പരാജയത്തെ കുറിച്ച് തുറന്നു സംസാരിച്ച് നടൻ പൃഥ്വിരാജ്. ചിത്രം തിയറ്ററുകളിൽ വിജയിച്ചില്ലെന്നും ബിസിനസ്സ് പരമായി ലാഭം തന്നെന്നും പൃഥ്വി പറഞ്ഞു. ലിസ്റ്റിൻ സ്റ്റീഫനും പൃഥ്വിരാജും ചേർന്നായിരുന്നു ഗോൾഡിന്റെ നിർമാണം.
പൃഥ്വിരാജ് പ്രൊഡക്‌ഷന്‍സ് ഈ വര്‍ഷം തിയറ്ററുകളില്‍ ഹാട്രിക് വിജയം നേടിയിരുന്നല്ലോ, അതുകൊണ്ടാണോ നിര്‍മാണ കമ്പനിയില്‍ ആദായനികുതി വകുപ്പ് റെയ്ഡ് നടത്തിയത്? എന്ന മാധ്യമ പ്രവര്‍ത്തകന്റെ ചോദ്യത്തിന് മറുപടി പറയുന്നതിനിടെയാണ് പൃഥ്വി ഇക്കാര്യം വെളിപ്പെടുത്തിയത്. വിജയ ചിത്രങ്ങളുടെ കൂട്ടത്തിൽ ഗോള്‍ഡ് ഇല്ല എന്നായിരുന്നു പൃഥ്വിയുടെ മറുപടി.
‘‘ഗോള്‍ഡ് വര്‍ക്ക് ചെയ്തില്ലല്ലോ, എന്നാല്‍ ഞങ്ങള്‍ക്ക് പ്രോഫിറ്റ് ആണ്. അതാണ് അതിന്റെ സത്യം”.–പൃഥ്വിരാജ് പറഞ്ഞു. രണ്ടാമത്തെ ചോദ്യം ആദായ നികുതി വകുപ്പിനോടാണ് ചോദിക്കേണ്ടതെന്നും താരം പറഞ്ഞു.
‘കാപ്പ’ എന്ന ചിത്രത്തിന്റെ പ്രമോഷന്റെ ഭാഗമായി നടത്തിയ പ്രസ്മീറ്റിലാണ് പൃഥ്വിരാജ് സംസാരിച്ചത്. ‘കടുവ’യുടെ വിജയത്തിന് ശേഷം ഷാജി കൈലാസും പൃഥ്വിരാജും വീണ്ടും ഒന്നിക്കുന്ന ചിത്രമാണ് കാപ്പ. ജി.ആര്‍ ഇന്ദുഗോപന്റെ പ്രശസ്ത നോവല്‍ ‘ശംഖുമുഖി’യെ ആസ്പദമാക്കി ഒരുക്കിയിരിക്കുന്ന ചിത്രം ആക്‌ഷന് പ്രാധാന്യമുള്ള ഒന്നാണ്.
