പുഷ്പയുടെ മുന്നിൽ കടുവ പോലും വിറച്ചു; പ്രമൊ വിഡിയോ പുറത്ത്

‘‘കാട്ടിലെ ജീവികൾ രണ്ടടി പിന്നോട്ടുവച്ചാൽ പുലി വരുന്നുണ്ടെന്നാണ് അർഥം, പുലി രണ്ടടി പുറകോട്ടുവച്ചാൽ ‘പുഷ്പ’ വരുന്നുണ്ടെന്നാണ് അർഥം.’’ ആരാധകരെ കോരിത്തരിപ്പിക്കുന്ന മാസ് ഡയലോഗും രംഗങ്ങളുമായി ‘പുഷ്പ 2’വിന്റെ ആദ്യ ഗ്ലിംപ്സ് എത്തി. ‘തിരുപ്പതി ജയിലില്‍ നിന്നും വെടിയേറ്റ മുറിവുകളുമായി രക്ഷപ്പെട്ട പുഷ്പ എവിടെ’യാണെന്ന് വിഡിയോയില്‍ ചോദിക്കുന്നു. തുടര്‍ന്നു വരുന്ന "പുഷ്പ എവിടെ?" എന്ന ചോദ്യം പ്രേക്ഷകമനസ്സുകളില്‍ കൂടുതല്‍ ആകാംക്ഷ ഉണര്‍ത്തുന്നുണ്ട്. വിഡിയോയുടെ അവസാനമാണ് പുഷ്പ പ്രത്യക്ഷപ്പെടുന്നത്.

സുകുമാറാണ് പുഷ്പ 2: ദ റൂള്‍ സംവിധാനം ചെയ്യുന്നത്. ഒന്നാം ഭാഗത്തില്‍ ഐ.പി.എസ് ഉദ്യോഗസ്ഥനായ ബന്‍വാര്‍ സിങ് ഷെഖാവത്ത് ആയി കൈയടി വാങ്ങിയ ഫഹദ് രണ്ടാം ഭാഗത്തിലും ഗംഭീര പ്രകടനം കാഴ്ചവെക്കുമെന്നാണ് ആരാധകരുടെ പ്രതീക്ഷ. 2024 മാര്‍ച്ചില്‍ ചിത്രം റിലീസ് ചെയ്യാനാണ് അണിയറപ്രവര്‍ത്തകര്‍ ശ്രമിക്കുന്നത്.

അല്ലു അര്‍ജുന്‍, രഷ്മികാ മന്ദാന, ഫഹദ് ഫാസില്‍ എന്നിവര്‍ മുഖ്യവേഷങ്ങളില്‍ എത്തുന്ന ചിത്രം നിർമിച്ചിരിക്കുന്നത് മൈത്രി മൂവി മേക്കേഴ്സാണ്. പിആര്‍ഒ ആതിര ദില്‍ജിത്ത്.