കൊടും വില്ലനായി രാഹുൽ ബോസ്; ജയം രവിയുടെ ‘ഇരൈവൻ’ ട്രെയിലർ

ജയം രവിയെ നായകനാക്കി ഐ. അഹമ്മദ് ഒരുക്കുന്ന സൈക്കോ ത്രില്ലർ ‘ഇരൈവൻ’ ട്രെയിലർ എത്തി. എൻടെൻട്രും പുന്നഗൈ, മനിതൻ എന്നീ ചിത്രങ്ങള്‍ക്കു ശേഷം അഹമ്മദ് സംവിധാനം ചെയ്യുന്ന ചിത്രം കൂടിയാണിത്. ക്രിമിനലുകളെ നിയമവ്യസ്ഥകളുടെ മുന്നിൽ വിട്ടുകൊടുക്കാതെ എൻകൗണ്ടർ ചെയ്യുന്ന പൊലീസ് ഉദ്യോഗസ്ഥനായി ജയം രവി എത്തുന്നു. ബ്രഹ്മ എന്ന ക്രൂരനായ സീരിയൽ കില്ലറായി ബോളിവുഡ് നടൻ രാഹുൽബോസും അഭിനയിക്കുന്നു.

ചെറിയ പെണ്‍കുട്ടികളെ അതിക്രൂരമായി കൊല ചെയ്യുന്ന സൈക്കോ കില്ലറായ ബ്രഹ്മ കസ്റ്റഡിയിൽ നിന്നും രക്ഷപ്പെടുന്നതും തുടര്‍ന്നുണ്ടാകുന്ന സംഭവവികാസങ്ങളുമാണ് ചിത്രം പറയുന്നത്. കടുത്ത വയലന്‍സ് രംഗങ്ങളാണ് ചിത്രത്തില്‍ എന്നാണ് സൂചന. സിനിമയുടെ ട്രെയിലറിലും വയലൻസിന്റെ അതിപ്രസരമുണ്ട്. നയന്‍താരയാണ് ചിത്രത്തില്‍ നായിക.

ആശിഷ് വിദ്യാര്‍ത്ഥി, നരേൻ തുടങ്ങിയ വലിയ താര നിര തന്നെ ചിത്രത്തില്‍ അഭിനയിക്കുന്നുണ്ട്. ബിഗ് ബോസ് സീസൺ ഫൈവ് മത്സരാർഥിയായിരുന്ന ലച്ചു (ഐശ്വര്യ സുരേഷ്) ഒരു പ്രധാന കഥാപാത്രമായി എത്തുന്നു. പാഷൻ സ്റ്റുഡിയോസിന്റെ ബാനറിൽ സുധൻ സുന്ദരവും ജയറാം ജിയും ചേർന്ന് നിർമ്മിച്ച ഈ ചിത്രം തമിഴ്, തെലുങ്ക്, മലയാളം, കന്നഡ ഭാഷകളിലായി പുറത്തിറങ്ങും.

തനി ഒരുവന് ശേഷം നയന്‍താരയും ജയം രവിയും ഒന്നിക്കുന്ന ചിത്രമാണ് ഇരൈവന്‍. യുവന്‍ ശങ്കര രാജയാണ് ചിത്രത്തിന്‍റെ സംഗീതം നിര്‍വഹിച്ചിരിക്കുന്നത്. ജയം രവിയും അഹമ്മദും മുമ്പ് ജനഗണമന എന്ന ചിത്രം ചെയ്തിരുന്നു. എന്നാല്‍ അത് റിലീസ് ചെയ്തിരുന്നില്ല.