അവിർഭവിനെ ചേർത്തു പിടിച്ച് അഭിനന്ദിച്ച് മോഹൻലാൽ; സ്നേഹമുത്തം നൽകി ചിത്ര

മോഹൻലാലിന്റെ അമ്മയുടെ പിറന്നാളിന് പാട്ടു പാടി കുട്ടി ഗായകൻ അവിർഭവ്. കുടുംബത്തോടൊപ്പമാണ് അവിർഭവ് മോഹൻലാലിന്റെ അമ്മയുടെ പിറന്നാളിന് താരത്തിന്റെ കൊച്ചിയിലെ വീട്ടിലെത്തിയത്. അമ്മയുടെ മുൻപിൽ പാട്ടു പാടിയ അവിർഭവ് പിറന്നാൾ സദ്യ കഴിച്ചതിനു ശേഷമാണ് മടങ്ങിയത്. 

സംവിധായകൻ മേജർ രവിയാണ് മോഹൻലാലിന്റെ വീട്ടിലേക്കുള്ള സർപ്രൈസ് സന്ദർശനത്തിന് വഴിയൊരുക്കിയതെന്ന് അവിർഭവിന്റെ അമ്മ സന്ധ്യ മനോരമ ഓൺലൈനോടു പറഞ്ഞു. "ലാലേട്ടന്റെ അമ്മയുടെ പിറന്നാളാണെന്ന് അറിയുമായിരുന്നില്ല. വലിയ സർപ്രൈസ് ആയിരുന്നു. അമ്മയ്ക്കു മുൻപിൽ അല്ലിയാമ്പൽ കടവിൽ എന്ന പാട്ട് അവിർഭവ് പാടി. അമ്മ ഒരു പുഞ്ചിരിയോടെയാണ് അതു കേട്ടത്. എല്ലാവർക്കും ഒപ്പം പിറന്നാൾ സദ്യ കൂടി കഴിച്ചാണ് ഞങ്ങൾ മടങ്ങിയത്," സന്ധ്യ പറഞ്ഞു. 

മോഹൻലാൽ, സുചിത്ര മോഹൻലാൽ, പ്രണവ് മോഹൻലാൽ എന്നിവർക്കൊപ്പം അവിർഭവ് എടുത്ത ചിത്രങ്ങൾ വൈറലായിരുന്നു. 

കഴിഞ്ഞ ദിവസം ഗായിക കെ.എസ് ചിത്രയേയും അവിർഭവ് നേരിൽ കണ്ടിരുന്നു. അങ്കമാലിയിൽ വച്ചാണ് ചിത്രയെ അവിർഭവ് കുടുംബസമേതം സന്ദർശിച്ചത്. ചിത്രയ്ക്കൊപ്പം സമയം ചെലവഴിച്ച അവിർഭവ് പ്രിയഗായികയ്ക്കു മുൻപിലും പാട്ടു പാടി. അവിർഭവിന്റെ പാട്ടും വിഡിയോകളും മിസ് ആകാതെ കാണാറുണ്ടെന്നായിരുന്നു ചിത്രയുടെ പ്രതികരണം. ഹിന്ദി ഭാഷ എങ്ങനെ പഠിച്ചെടുത്തു എന്നായിരുന്നു അവിർഭവിനെ കണ്ടപ്പോൾ ചിത്രയുടെ ചോദ്യം. സ്നേഹമുത്തം നൽകിയാണ് ചിത്ര അവിർഭവിനെ യാത്രയാക്കിയത്. 

ഹിന്ദി റിയാലിറ്റി ഷോയിൽ വിജയി ആയതിനു ശേഷം കഴിഞ്ഞ ആഴ്ചയാണ് അവിർഭവ് കൊച്ചിയിൽ തിരിച്ചെത്തിയത്. റിയാലിറ്റി ഷോയിൽ പങ്കെടുക്കാൻ പോയപ്പോൾ അവിർഭവിന് ഒട്ടും ഹിന്ദി അറിയുമായിരുന്നില്ല. പക്ഷേ, ഹിന്ദി പാട്ടുകൾ അനായാസമായാണ് അവിർഭവ് പാടി കയ്യടി നേടിയത്.