കർഷകർക്ക് അനുകൂലം, പുഴുക്കലരിയുടെ കയറ്റുമതി തീരുവ ഒഴിവാക്കി

ന്യൂഡൽഹി∙ പുഴുക്കലരിയുടെ (പാർബോയിൽഡ് റൈസ്) കയറ്റുമതി തീരുവ കേന്ദ്രം പൂർണമായും എടുത്തുകളഞ്ഞു. ആഭ്യന്തര ലഭ്യത വർധിച്ച സാഹചര്യത്തിലാണ് കയറ്റുമതി വർധിപ്പിക്കാൻ സഹായകമായ തീരുമാനം. അരിയുടെ വിലക്കയറ്റം തടയുന്നതിനാണ് 2023 ഓഗസ്റ്റിൽ 20% തീരുവ ചുമത്തി പുഴുക്കലരിയുടെ കയറ്റുമതിക്ക് നിയന്ത്രണം ഏർപ്പെടുത്തിയത്. ആഭ്യന്തര ലഭ്യത ഉറപ്പാക്കാനായിരുന്നു‌ നീക്കം. പിന്നീട് ഇക്കഴിഞ്ഞ മാസം കയറ്റുമതി തീരുവ 20 ശതമാനമായിരുന്നത് 10 ശതമാനമായി കുറച്ചു. ഈ 10 ശതമാനമാണ് ഇപ്പോൾ എടുത്തുകളഞ്ഞത്.

കയറ്റുമതി കൂടുന്നത് കർഷകർക്ക് ഗുണകരമാണ്, അതേസമയം, ദീർഘകാല അടിസ്ഥാനത്തിൽ ആഭ്യന്തര വിപണിയിൽ വില കൂടാനിടയുണ്ട്. കിലോയ്ക്ക് 3 രൂപ വരെ വർധിക്കാം.