ചൂട് കൊണ്ട് നില്ക്കാൻ വയ്യ!! ചർമത്തിന്റെ കാര്യത്തിൽ ഈ 4 തെറ്റുകൾ ചെയ്യുകയേ അരുത്

ചൂടു കൊണ്ട് ഇപ്പോൾ പുറത്തിറങ്ങാൻ പറ്റാത്ത അവസ്ഥയാണ്. അമിതമായ ചൂട്, ഈർപ്പം, സൂര്യപ്രകാശം എന്നിവ കാരണം വേനൽക്കാലം നിങ്ങളുടെ ചർമത്തിന് ശരിക്കും കഠിനമായിരിക്കും. ഒരളവിൽ സൂര്യപ്രകാശം ചർമത്തിന് ആവശ്യമാണെങ്കിലും അവ അധികമായാൽ ചർമത്തെ ദോഷകരമായി ബാധിക്കുകയും ചർമത്തിൽ പൊള്ളൽ, ടാനിങ്, അലർജികൾ, തിണർപ്പ് എന്നിവയ്ക്ക് കാരണമാകുകയും ചെയ്യും. അതിനാൽ, നിങ്ങളുടെ ചർമത്തിന്റെ ആരോഗ്യവും തിളക്കവും നിലനിർത്തുന്ന ഒരു നല്ല ചർമസംരക്ഷണ ദിനചര്യ ഉൾപ്പെടുത്തേണ്ടത് വളരെ അത്യാവശ്യമാണ്. എന്നാൽ പലരും ഇവ ചെയ്യുമ്പോൾ ഒത്തിരി തെറ്റുകൾ വരുത്താറുണ്ട്. അവ എന്തൊക്കെയാണെന്ന് നമുക്കൊന്ന് നോക്കാം. 

ക്ലെൻസിങ്ങിന് വേണം കൂടുതൽ കരുതൽ 
പുറത്തുപോകുന്നവരുടെ ചർമത്തിൽ ധാരാളം വിയർപ്പ് ശേഖരിക്കപ്പെടാൻ സാധ്യതയുണ്ട്. അതിനാൽ ദിവസവും ചർമം വൃത്തിയായി സൂക്ഷിച്ചില്ലെങ്കിൽ പണി കിട്ടും. നിങ്ങളുടെ ചർമം എണ്ണമയമുള്ളതോ വരണ്ടതോ സെൻസിറ്റീവായതോ ആവട്ടെ അനുയോജ്യമായ ഒരു ക്ലെൻസർ ഉപയോഗിച്ച് ദിവസത്തിൽ ഒന്നിലധികം തവണ ചർമം കഴുകുന്നത് അത്യാവശ്യമാണ്. മുഖക്കുരുവിനെതിരെ പോരാടാനും ചർമത്തിലെ അധിക എണ്ണയും അഴുക്കും ഇല്ലാതാക്കാനും ഇത് സഹായിക്കും. കൂടാതെ, ചർമത്തിലെ മൃതകോശങ്ങളെ നീക്കം ചെയ്യുകയും മോയ്സ്ചറൈസറുകളും മറ്റ് ചർമസംരക്ഷണ ഉൽപന്നങ്ങളും നന്നായി ആഗിരണം ചെയ്യാൻ ചർമത്തെ പ്രാപ്തമാക്കുകയും ചെയ്യുന്നു. രാവിലെയും രാത്രിയും ചർമസംരക്ഷണ ദിനചര്യ പിന്തുടരുന്നത് വളരെ ഉത്തമമാണ്.

സൺസ്‌ക്രീൻ ഒരിക്കലിട്ടാൽ മാത്രം പോരാ 
സൺക്രീൻ ഇടാതെ പുറത്തിറങ്ങുന്നത് ഒരിക്കലും ശരിയല്ല. അകാല വാർധക്യവും അർബുദവും ഉൾപ്പെടെ നിങ്ങളുടെ ചർമത്തിന് അൾട്രാവയലറ്റ് വികിരണം വലിയ പ്രശ്നങ്ങൾ ഉണ്ടാക്കും. ഒരു നല്ല സൺസ്ക്രീൻ ചർമ സംരക്ഷണത്തിൽ ഉൾപ്പെടുത്തുന്നത് വളരെ പ്രധാനമാണ്, അത് എല്ലാ ദിവസവും ഉപയോഗിക്കേണ്ടതാണ്. പലരും സൺസ്‌ക്രീൻ ഇടുന്നുണ്ടെങ്കിലും അത് നിശ്ചിത ഇടവേളകളിൽ വീണ്ടും ഉപയോഗിക്കണം എന്ന കാര്യം മറക്കുന്നു. ഇതാണ് പലരും ചെയ്യുന്ന വലിയ തെറ്റ്. ആവശ്യമുള്ളപ്പോൾ സൺസ്ക്രീൻ വീണ്ടും തീർച്ചയായും ഉപയോഗിക്കുക.

മോയ്സ്ചറൈസിംഗ് മർമപ്രധാനം 
ലോകമെമ്പാടുമുള്ള നിരവധി ആളുകളുടെ ചർമസംരക്ഷണ ദിനചര്യയിൽ കാണപ്പെടുന്ന മറ്റൊരു തെറ്റ് അതിലെ മോയ്സ്ചറൈസേഷന്റെ അഭാവമാണ്. ചർമസംരക്ഷണ ദിനചര്യയുടെ ഏറ്റവും പ്രധാനപ്പെട്ട ഘട്ടങ്ങളിലൊന്നാണ് മോയ്സ്ചറൈസേഷൻ. കാരണം ഇത് നിങ്ങളുടെ ചർമത്തെ ഈർപ്പമുള്ളതാക്കുകയും ബാഹ്യ ഘടകങ്ങളിൽ നിന്ന് സംരക്ഷിക്കുകയും ചെയ്യുന്നു. മോയ്സ്ചറൈസേഷന്റെ അഭാവം വരൾച്ച, ചുളിവുകൾ, അകാല വാർധക്യം തുടങ്ങിയ പ്രശ്നങ്ങൾക്ക് കാരണമാകുന്നു. അതിനാൽ, നിങ്ങളുടെ മുഖം ശരിയായി വൃത്തിയാക്കിയതിന് ശേഷം ചർമത്തിന് അനുയോജ്യമായ മോയ്സ്ചറൈസർ പുരട്ടുന്നത് നല്ലതാണ്, 

മുഖം മാത്രം ശ്രദ്ധിച്ചാൽ പോരാ
ആളുകൾ ചെയ്യുന്ന ഏറ്റവും സാധാരണമായ തെറ്റുകളിൽ ഒന്നാണിത്. നിങ്ങളുടെ കഴുത്തും കൈകളും ഉൾപ്പെടെയുള്ള ചർമം ഒഴിവാക്കിക്കൊണ്ട് മുഖത്തെ പരിപാലിക്കുന്നതിൽ കൂടുതൽ ശ്രദ്ധകൊടുക്കുന്നു. ചർമസംരക്ഷണം ഒരു സമഗ്രമായ പ്രക്രിയയാണ്, അത് മുഴുവൻ ശരീരത്തിനും നൽകേണ്ടത് പ്രാധാനമാണ്. അതിനാൽ, നിങ്ങളുടെ ശരീരം മുഴുവൻ ശരിയായി കഴുകുകയും ചർമത്തെ ഈർപ്പമുള്ളതാക്കുകയും സൂര്യപ്രകാശം നേരിട്ട് ഏൽക്കുന്ന ഭാഗങ്ങളിൽ സൺസ്‌ക്രീൻ പുരട്ടുകയും ചെയ്യേണ്ടത് വളരെ പ്രധാനമാണ്.