ഹാരപ്പയുടെ ആ രഹസ്യം കണ്ടെത്തുന്നവർക്ക് 8.57 കോടി! ഇന്ത്യയുടെ ചരിത്രം തുടങ്ങിയ സംസ്കാരം

ഇന്ത്യയുടെ ചരിത്രത്തിന്റെ കളിത്തൊട്ടിലായ ഹാരപ്പൻ സംസ്കാരം അഥവാ സിന്ധുനദീതട സംസ്കാരത്തെക്കുറിച്ചുള്ള സമഗ്രമായ പഠനങ്ങൾ പുറത്തിറങ്ങിയിട്ട് 100 വർഷം തികയുകയാണ്. ഇന്നും അനേകം ദുരൂഹതകൾ ഒളിപ്പിച്ചുവച്ചിരിക്കുകയാണ് ഹാരപ്പൻ കാലഘട്ടം. അനേകം ഗവേഷണങ്ങളും ഇതെപ്പറ്റി നടക്കുന്നുണ്ട്.ഇപ്പോഴിതാ പുതിയൊരു കൗതുകകരമായ വാർത്ത. സിന്ധുനദീതട മേഖലയിൽ നിന്നു കണ്ടെത്തിയ ചില പ്രാചീന ലിഖിതങ്ങളിൽ പറയുന്നത് എന്താണെന്നു കൃത്യമായി മനസ്സിലാക്കാൻ കഴിയുന്നവർക്ക് വലിയൊരു പാരിതോഷികം പ്രഖ്യാപിച്ചിരിക്കുകയാണ് തമിഴ്നാട്. 8.57 കോടി രൂപയാണു തമിഴ്നാടിന്റെ വാഗ്ദാനം. സിന്ധു നദീതട സംസ്കാരം ദ്രാവിഡമാണെന്നും അവിടെയുണ്ടായിരുന്ന ഭാഷ ദ്രാവിഡഭാഷയാണെന്നും നീണ്ടനാളായി ഡിഎംകെ വാദമുയർത്തുന്നുണ്ട്. എന്നാൽ‌ ഇവിടെ നിന്നു ചിത്രലിപിയിൽ കണ്ടെത്തിയ ലിഖിതങ്ങളിലെ ഭാഷ മനസ്സിലാക്കാൻ ഗവേഷകർക്ക് ഇതുവരെ സാധിച്ചിട്ടില്ല.

ആദിമകാലത്തെ ഏറ്റവും വികസിതമായ സാമൂഹിക വ്യവസ്ഥകളിലൊന്നായിരുന്നു സിന്ധുനദീതട സംസ്കാരം അഥവാ ഹാരപ്പൻ സംസ്കാരം. മെസപ്പൊട്ടേമിയയിലും ഈജിപ്തിലുമൊക്കെ അക്കാലത്ത് നാഗരിക സംസ്കാരമുണ്ടായിരുന്നു. എന്നാൽ സിന്ധുനദീതട സംസ്കാരം സാങ്കേതിക ശേഷിയുടെ കാര്യത്തിൽ മുന്നിട്ടു നിന്നു. വീട്ടുപകരണങ്ങൾ, വീടുകളിൽ നിന്നുള്ള വെള്ളം കാനകളിലേക്ക് എത്തിക്കുന്ന സംവിധാനങ്ങൾ, സ്നാനഘട്ടം, ധാന്യപ്പുരകൾ എന്നിവയൊക്കെ സിന്ധു നദീതട സംസ്കാരത്തിൽപെട്ട നഗരങ്ങളിലുണ്ടായിരുന്നു. ഹാരപ്പൻ സമൂഹം എങ്ങനെയാണ് വാസയോഗ്യമല്ലാതായി നശിച്ചതെന്ന കാര്യത്തിൽ വിദഗ്ധർ തമ്മിൽ ഇന്നും ചർച്ചകൾ തുടരുകയാണ്. കാലാവസ്ഥാ വ്യതിയാനം മൂലമുണ്ടായ നിരവധി പ്രശ്നങ്ങളോ അല്ലെങ്കിൽ ശത്രുസേനകളുടെ ആക്രമണമോ അങ്ങനെയെന്തെങ്കിലുമൊക്കെയാകാം നഗരങ്ങളുടെ നാശത്തിനു കാരണമായതെന്ന് പൊതുവെ പല അഭിപ്രായങ്ങളുണ്ട്.

സിന്ധുനദീതട  സംസ്കാരത്തെപ്പറ്റി ആദ്യം അറിവു ലഭിക്കുന്നത്, ആർക്കയോളജിക്കൽ സര്‍വേ ഓഫ് ഇന്ത്യയിലെ ശാസ്ത്രജ്ഞൻ ദയാറാം സാഹ്നി ഹാരപ്പ നഗരം കണ്ടെത്തിയതോടെയാണ്. കൃത്യമായി പ്ലാൻ ചെയ്ത നഗരസംവിധാനങ്ങളും മലിനജലം ഒഴുക്കിക്കളയാനുള്ള കനാൽശൃംഖലയുമൊക്കെയുള്ള ഹാരപ്പ നഗരം 1921ൽ ആദ്യം കണ്ടെത്തിയപ്പോൾ പുരാവസ്തുഗവേഷകർ ഞെട്ടിപ്പോയി. ഇത്രയ്ക്കും വിപുലമായ ഒരു നഗരം ആരുമവിടെ പ്രതീക്ഷിച്ചിരുന്നില്ല. പിറ്റേവർഷമായിരുന്നു മോഹൻ ജൊദാരോയുടെ കണ്ടെത്തൽ. ആർഡി ബാനർജി എന്ന രഖൽ ദാസ് ബാനർജിയാണ് ഈ പ്രാചീനനഗരം കണ്ടെത്തിയത്.

ഇന്നത്തെ പാക്കിസ്ഥാനിലും ഇന്ത്യയിലുമായി സിന്ധുനദീതട സംസ്കാരത്തിന്റെ കേന്ദ്രങ്ങളായ വിവിധ നഗരങ്ങൾ താമസിയാതെ മറനീക്കി പുറത്തുവന്നു. ഗുജറാത്തിലെ ലോഥലും രാജസ്ഥാനിലെ കാലിബംഗാനുമൊക്കെ ഇതിൽ ഉൾപ്പെടും. കാലാവസ്ഥാ വ്യതിയാനം കാരണമുണ്ടായ മാറ്റങ്ങളാണ് നഗരങ്ങളുടെ പതനത്തിനു വഴിവച്ചതെന്നു സിദ്ധാന്തം പിൽക്കാലത്ത് ഏറെ ശ്രദ്ധ നേടി. വരൾച്ചയോ പ്രകൃതിദുരന്തമോ അല്ലെങ്കിൽ പകർച്ച വ്യാധികളോ കാരണം ഇവിടെ താമസിച്ചിരുന്ന ജനസമൂഹം നശിച്ചിരിക്കാം അല്ലെങ്കിൽ അവർ താമസം മാറ്റിയിരിക്കാം എന്നായിരുന്നു ഇതു മുന്നോട്ടുവച്ചവർ പറഞ്ഞത്.