അഭിനയപ്രകടനവുമായി അജിത്ത്; നേർകൊണ്ട പാർവൈ ട്രെയിലർ

അജിത്ത് നായകനാകുന്ന പുതിയ ചിത്രം നേർകൊണ്ട പാർവൈ
ട്രെയിലർ റിലീസ് ചെയ്തു. അമിതാഭ് ബച്ചൻ–താപ്സി എന്നിവർ പ്രധാനവേഷങ്ങളിലെത്തിയ സൂപ്പർഹിറ്റ് ചിത്രം പിങ്കിന്റെ റീമേയ്ക്ക് ആണിത്.

കാർത്തിയെ നായകനാക്കി തീരൻ അധികാരം ഒൻഡ്രു എന്ന ചിത്രം സംവിധാനം ചെയ്‌തെ എച്ച്. വിനോദ് ആണ് ഈ ചിത്രം സംവിധാനം ചെയ്യുന്നത്. ബേ വ്യൂ പ്രോജെക്ടസിന്റെ ബാനറിൽ ബോളിവുഡ് നിർമാതാവും അന്തരിച്ച നടി ശ്രീദേവിയുടെ ഭർത്താവുമായ ബോണി കപൂർ ആണ് ഈ ചിത്രം നിർമിക്കുന്നത്.  

അഭിഭാഷകന്റെ വേഷത്തിലാണ് തല അജിത്ത് എത്തുന്നത്. ശ്രദ്ധ ശ്രീനാഥാണ് താപ്സി പന്നു അവതരിപ്പിച്ച കഥാപാത്രത്തെ കൈകാര്യം ചെയ്യുന്നത്. മഹേഷിന്റെ പ്രതികാരത്തില്‍ വില്ലനായി എത്തിയ സുജിത്ത് ശങ്കറും ചിത്രത്തിലൊരു പ്രധാനവേഷത്തിലെത്തുന്നു.

അഭിരാമി വെങ്കടാചലം, ആൻഡ്രിയ തരിയൻഗ്, ആദിക് രവിചന്ദ്രൻ, അർജുൻ ചിദംബരം, അശ്വിൻ റാവു എന്നിവരാണ് ചിത്രത്തിലെ മറ്റു താരങ്ങൾ. ചിത്രം ഓഗസ്റ്റ്‌ 10ന് തീയറ്ററുകളിലെത്തും. 

നീരവ് ഷായാണ് ഛായാഗ്രഹണം. യുവൻ ശങ്കര്‍ രാജ സംഗീതം. ചിത്രസംയോജനം ഒരുക്കുന്നത് ഗോകുൽ ചന്ദ്രൻ ആണ്.