‘ഈ ലിപ്‌ലോക്ക് കുറച്ച് കടുത്തുപോയി’; പാപം ചെയ്യാത്തവർ കല്ലെറിയട്ടെ ട്രെയിലർ

ഏറെ ചർച്ചചെയ്യപ്പെട്ട 'വെടിവഴിപാട്' എന്ന ചിത്രത്തിനുശേഷം ശംഭു പുരുഷോത്തമൻ സംവിധാനം ചെയ്യുന്ന ചിത്രമാണ് ‘പാപം ചെയ്യാത്തവർ കല്ലെറിയട്ടെ’ ട്രെയിലർ റിലീസ് ചെയ്തു. വിനയ് ഫോർട്ട് നായകനാകുന്ന ചിത്രത്തിന്റെ ട്രെയിലർ തന്നെ ഏറെ രസകരമാണ്.

ശാന്തി ബാലചന്ദ്രനും അരുൺ കുര്യനും തമ്മിലുള്ള ലിപ്‌ലോക്ക് ആണ് ട്രെയിലറിലെ മറ്റൊരു ആകർഷണ ഘടകം. ലിന്റ എന്ന കഥാപാത്രമായി ശാന്തിയും രോഹനായി അരുണും അഭിനയിക്കുന്നു. രസകരമായ കമന്റുകളാണ് ഈ രംഗത്തിനു പ്രേക്ഷകരിൽ നിന്നും ലഭിക്കുന്നത്. ‘ഈ ലിപ്‌ലോക്ക് കുറച്ച് കടുത്തുപോയെന്ന്’ ട്രെയിലർ കണ്ട ശേഷം പ്രേക്ഷകർ കുറിക്കുന്നു.

വിനയ് ഫോർട്ട്, റോയ് എന്ന പ്രധാന കഥാപാത്രത്തെയാണ് അവതരിപ്പിക്കുന്നത്. കോട്ടയത്തുള്ള പ്രമുഖ പ്രമാണികുടുംബത്തിലെ അംഗമാണ് റോയ്. ഇപ്പോൾ പ്രതാപമൊക്കെ കുറഞ്ഞ ആ കുടുംബത്തിലെ എല്ലാ ഉത്തരവാദിത്വവും റോയിക്കാണ്. അയാളുടെ ചുറ്റും നടക്കുന്ന കാര്യങ്ങളാണ് സിനിമ പറയുന്നത്.

വിനയ് ഫോർട്ടിനെ കൂടാതെ ശാന്തി ബാലകൃഷ്ണൻ, അരുൺ കുര്യൻ, ശ്രിന്ദ, മധുപാൽ, അലൻസിയർ, ടിനി ടോം, അനുമോൾ, കോട്ടയം പ്രദീപ് എന്നിവരും ചിത്രത്തിലുണ്ട്.

സ്പൈർ പ്രൊഡക്‌ഷൻസിന്റെ ബാനറിൽ സഞ്ജു. എസ്. ഉണ്ണിത്താൻ ആണ് നിർമിക്കുന്നത്. പ്രശാന്ത് പിള്ള ആണ് ചിത്രത്തിന് വേണ്ടി സംഗീതം ഒരുക്കുന്നത്.