മുരുകദോസ്–ശിവകാർത്തികേയൻ ചിത്രത്തിൽ ബിജു മേനോൻ; വിഡിയോ

ശിവകാർത്തികേയനെ നായകനാക്കി എ.ആർ. മുരുകദോസ് ഒരുക്കുന്ന ആക്‌ഷൻ ത്രില്ലറിൽ ബിജു മേനോനും. നിർമാതാക്കളായ ശ്രീലക്ഷ്മി മൂവീസ് ഇക്കാര്യം ഔദ്യോ​ഗികമായി പ്രഖ്യാപിച്ചു. ചിത്രത്തിലേക്ക് ബിജു മേനോനെ സ്വാ​ഗതം ചെയ്തുകൊണ്ടുള്ള വിഡിയോയും അണിയറക്കാർ പുറത്തിറക്കി.

ദൈവത്തിന്റെ സ്വന്തം നാട്ടിൽ നിന്നുള്ള ഒരു ​ഗംഭീര അഭിനേതാവ് തങ്ങൾക്കൊപ്പം ചേർന്നിരിക്കുന്നു എന്നാണ് വിഡിയോക്കൊപ്പം നിർമാതാക്കൾ കുറിച്ചത്. കന്നഡ താരം രു​ഗ്മിണി വസന്ത് ആണ് നായികയാവുന്നത്. വിദ്യുത് ജംവാൽ ആണ് വില്ലൻ വേഷത്തിൽ.  അനിരുദ്ധ് രവിചന്ദർ സംഗീത സംവിധാനം നിർവഹിക്കുന്ന ഈ ചിത്രത്തിന്റെ ഛായാഗ്രഹണം സുദീപ് ഇളമൺ, എഡിറ്റിങ് ശ്രീകർ പ്രസാദ്, കലാസംവിധാനം- അരുൺ വെഞ്ഞാറമ്മൂട്, സംഘട്ടന സംവിധാനം- മാസ്റ്റർ ദിലീപ് സുബ്ബരായൻ.

14 വർഷങ്ങൾക്കുശേഷമാണ് ബിജു മേനോൻ തമിഴ്ചിത്രത്തിൽ അഭിനയിക്കുന്നത്. 2005-ൽ ഷാഫിയുടെ സംവിധാനത്തിൽ പുറത്തിറങ്ങിയ മജാ ആണ് ബിജു മേനോന്റെ ആദ്യ തമിഴ് ചിത്രം. 2010-ൽ പുറത്തിറങ്ങിയ പോർക്കളത്തിലാണ് അദ്ദേഹം ഇതിനുമുൻപ് തമിഴിൽ വേഷമിട്ടത്.