അത് ലൂസിഫർ ഒാഡിഷൻ അല്ല: പ്രചരിപ്പിക്കുന്നത് വ്യാജവാർത്തകളെന്നു മാളവിക ശ്രീനാഥ്

തന്റെ പേരിൽ പ്രചരിപ്പിക്കുന്ന വിഡിയോയ്ക്ക് ഇപ്പോൾ നടക്കുന്ന സംഭവവികാസങ്ങളുമായി യാതൊരു ബന്ധവുമില്ലെന്നും സിനിമയിലെത്തും മുമ്പ് നടന്ന സംഭവത്തെക്കുറിച്ച് താൻ പറഞ്ഞ കാര്യങ്ങളാണ് അതെന്നും നടി മാളവിക ശ്രീനാഥ്. പഴയ വിഡിയോയിലെ ചില ഭാഗങ്ങൾ കട്ട് ചെയ്ത് ആരോ പ്രചരിപ്പിക്കുന്നതാണെന്നും ഈ സമയത്ത് ഇങ്ങനെ ആളുകളെ തെറ്റിധരിപ്പിക്കരുതെന്നും മാളവിക സമൂഹമാധ്യമത്തിൽ പങ്കു വച്ച കുറിപ്പിൽ പറയുന്നു. 

‘ദയവായി വ്യാജവാർത്തകൾ പ്രചരിപ്പിക്കുന്നത് നിർത്തുക. ഇപ്പോൾ പ്രചരിക്കുന്ന വിഡിയോ ക്ലിപ്പ് എന്റെ അഭിമുഖത്തിലെ ചെറിയ ഭാഗം മാത്രമാണ്. പലരും മുഴുവൻ അഭിമുഖവും കണ്ടിട്ടില്ല. യഥാർത്ഥ സംഭവത്തെക്കുറിച്ച് അറിയുകയുമില്ല.10 വർഷങ്ങൾക്കു മുൻപ് നടന്ന അനുഭവമാണ് പങ്കുവച്ചത്. ഞാൻ സിനിമയിൽ പ്രവേശിക്കുന്നതിന് മുൻപ്. അതിൽ പങ്കെടുത്തവർക്ക് സിനിമയുമായി യാതൊരു ബന്ധവുമില്ല. അവർ പണം നേടാൻ വേണ്ടി നടത്തിയ ഫേക്ക് ഓഡിഷനായിരുന്നു. ഇപ്പോഴത്തെ പ്രശ്നങ്ങളുമായി എന്റെ വീഡിയോക്ക് യാതൊരു ബന്ധവുമില്ല. ദയവായി ഈ ക്ലിപ് ശ്രദ്ധ നേടാൻ വേണ്ടി ഷെയർ ചെയ്യുന്നത് നിർത്തുക. വ്യാജവാർത്തകൾ പ്രചരിപ്പിക്കുന്നത് നിർത്തുക. ഇപ്പോൾ നടക്കുന്ന പ്രശ്നനങ്ങളിൽ എനിക്ക് യാതൊരു പങ്കുമില്ല.’ മാളവിക കുറിച്ചു. 

മാളവിക നേരത്തെ കൊടുത്ത അഭിമുഖത്തിൽ നിന്നുള്ള ചില ഭാഗങ്ങളാണ് ലൂസിഫർ സിനിമയിലേതെന്നു പറഞ്ഞ് സമൂഹമാധ്യമങ്ങളിൽ പ്രചരിക്കുന്നത്. തനിക്ക് ഒരു ഒാഡിഷനിൽ നേരിടേണ്ടി വന്ന ദുരനുഭവത്തെക്കുറിച്ചാണ് താരം ആ അഭിമുഖത്തിൽ പറഞ്ഞത്. മാളവിക മനസ്സു വച്ചാൽ മഞ്ജു വാരിയരുടെ മകളുടെ വേഷം ലഭിക്കുമെന്ന് ഒാഡിഷൻ നടത്തിയ ആൾ പറഞ്ഞെന്നും എന്നാൽ താൻ അവിടെ നിന്നും രക്ഷപെട്ടെന്നുമാണ് നടി പറഞ്ഞത്. കാസർഗോൾഡ്, സാറ്റർഡേ നൈറ്റ്, മധുരം തുടങ്ങിയ സിനിമളിൽ അഭിനയിച്ച നടിയാണ് മാളവിക ശ്രീനാഥ്‌.