യാത്ര മുടങ്ങിയോ? വിമാനടിക്കറ്റ്, ഹോട്ടൽ ബുക്കിങ് ഇവയ്ക്കെല്ലാം മുടക്കിയ പണവും പോകുമോ
Mail This Article
യാത്രാ ഇന്‍ഷുറന്‍സ് യാത്രക്കാര്‍ക്ക് അനിവാര്യമാണിന്ന്. ഇതില്‍ ഏറ്റവും പ്രധാനപ്പെട്ട സവിശേഷതകളിലൊന്നാണ് ട്രിപ്പ് ക്യാന്‍സലേഷന്‍ കവറേജ്. ഒരു യാത്ര ആസൂത്രണം ചെയ്തതുപോലെ മുന്നോട്ട് പോകാന്‍ കഴിയാത്തപ്പോള്‍ സാമ്പത്തിക നഷ്ടം ലഘൂകരിക്കാനാണ് ഇവ. വിമാന ടിക്കറ്റുകള്‍, ഹോട്ടല്‍ ബുക്കിങുകള്‍, മറ്റ് യാത്രാ സംബന്ധമായ ചിലവുകള്‍ തുടങ്ങിയവയ്ക്ക് റീഫണ്ട് ലഭിക്കില്ല. എന്നാല്‍ യാത്രാ ഇന്‍ഷുറന്‍സ് വഴി ഇവയ്ക്കായി മുടക്കിയ തുകയെല്ലാം തിരിച്ചു കിട്ടും. എന്നാൽ പ്രത്യേക കാരണങ്ങളാല്‍ മാത്രമാണ് കവറേജ് നല്‍കുന്നത് എന്നത് ശ്രദ്ധിക്കേണ്ടതാണ്.
മെഡിക്കല്‍ അത്യാഹിതങ്ങള്‍
യാത്ര ചെയ്യുന്നയാള്‍ക്കോ അല്ലെങ്കില്‍ യാത്രക്കാരന്റെ അടുത്ത ബന്ധുവിനോ രോഗമോ അപകടമോ വന്നാല്‍ പെട്ടെന്ന് യാത്ര റദ്ദാക്കേണ്ടി വരും. ഈ സാഹചര്യത്തില്‍ യാത്രാ ഇന്‍ഷുറന്‍സ് ട്രിപ്പ് കാന്‍സലേഷന്‍ പരിരക്ഷ ലഭിക്കും. എന്നാല്‍ കൃത്യമായ രേഖകൾ നല്‍കേണ്ടി വരും.
പ്രകൃതി ദുരന്തങ്ങള്‍
ഭൂകമ്പം, വെള്ളപ്പൊക്കം, അല്ലെങ്കില്‍ യാത്രാ പദ്ധതികളെ തടസപ്പെടുത്തുന്ന കഠിനമായ കാലാവസ്ഥ തുടങ്ങിയവയും യാത്രാ ഇന്‍ഷുറന്‍സില്‍ ഉള്‍പ്പെടും. അതിനാല്‍ ഇവ ക്ലെയിം ചെയ്യാവുന്നതാണ്.
വ്യക്തിപരമായ അത്യാഹിതങ്ങള്‍
ഒരു കുടുംബാംഗത്തിന്റെ മരണം അല്ലെങ്കില്‍ മറ്റ് പ്രധാനപ്പെട്ട വ്യക്തിപരമായ പ്രതിസന്ധികള്‍ പോലുള്ള സാഹചര്യങ്ങളും ട്രിപ്പ് റദ്ദാക്കല്‍ കവറേജ് കിട്ടാൻ കാരണമാകും. എന്നാല്‍ ഇത്തരം സാഹചര്യത്തില്‍ യാത്ര റദ്ദാക്കുമ്പോള്‍ ഇന്‍ഷുറന്‍സ് ദാതാവിനെ അറിയിക്കണമെന്ന് പല പോളിസികളിലും വ്യവസ്ഥയുണ്ട്.
തീവ്രവാദവും ആഭ്യന്തര കലാപവും
യാത്രക്കാരന്റെ ലക്ഷ്യസ്ഥാനത്ത് ഒരു തീവ്രവാദ ആക്രമണമോ ആഭ്യന്തര കലാപമോ ഉണ്ടായാൽ യാത്ര റദ്ദാക്കാനും അവരുടെ ചെലവുകള്‍ക്കുള്ള റീഇമ്പേഴ്സ്മെന്റ് ക്ലെയിം ചെയ്യാനും സാധിക്കും.
എങ്ങനെ ക്ലെയിം ഫയല്‍ ചെയ്യാം
ഉപഭോക്താക്കള്‍ ബന്ധപ്പെട്ട രേഖകള്‍ ഇന്‍ഷുറന്‍സ് കമ്പനിക്ക് സമര്‍പ്പിക്കണം. ഓരോ ഇന്‍ഷുറന്‍സ് കമ്പനിയുടെയും ആവശ്യകത വ്യത്യാസപ്പെടാം. ഉദാഹരണം, ഉപഭോക്താവ് കുറഞ്ഞത് 48 മണിക്കൂറെങ്കിലും ആശുപത്രിയില്‍ കിടക്കുകയാണെങ്കില്‍ ട്രിപ്പ് ക്യാന്‍സലേഷന്‍ കവറേജ് നല്‍കും. ഇതിനായി പോളിസി ഉടമ ഡിസ്ചാര്‍ജ് സംഗ്രഹം, സ്ഥിരീകരിച്ച ഹോട്ടല്‍, വിമാന ബുക്കിങ് വിശദാംശങ്ങള്‍, റദ്ദാക്കല്‍ തെളിവുകള്‍ സമര്‍പ്പിക്കേണ്ടതുണ്ട്.ഇതിനായി പ്രത്യേക ഫോം തന്നെ കമ്പനികള്‍ക്കുണ്ട്.
ഒഴിവാക്കലുകളും പരിഗണനകളും
നിലവിലുള്ള മെഡിക്കല്‍ അവസ്ഥകള്‍, ഗര്‍ഭധാരണവുമായി ബന്ധപ്പെട്ട പ്രശ്‌നങ്ങള്‍ അല്ലെങ്കില്‍ ഇന്‍ഷുറന്‍സ് വാങ്ങുന്നതിന് മുമ്പ് അറിയാവുന്ന സാഹചര്യങ്ങള്‍ എന്നിവ സാധാരണ ഒഴിവാക്കലുകളില്‍ ഉള്‍പ്പെടുന്നു. കൂടാതെ, സാധുവായ കാരണമില്ലാതെ അല്ലെങ്കില്‍ വ്യക്തിപരമായ മുന്‍ഗണന കാരണം യാത്ര റദ്ദാക്കിയാല്‍ റീഇംബേഴ്‌സ്‌മെന്റ് ബാധകമായേക്കില്ല.
ക്ലെയിമുകള്‍ ഫയല്‍ ചെയ്യുന്നതിനുള്ള സമയപരിധിയെക്കുറിച്ചും യാത്രക്കാര്‍ അറിഞ്ഞിരിക്കണം. മിക്ക ഇന്‍ഷുറര്‍മാരും റദ്ദാക്കലിനുശേഷം ഒരു നിശ്ചിത കാലയളവിനുള്ളില്‍ ക്ലെയിമുകള്‍ സമര്‍പ്പിക്കണമെന്ന് ആവശ്യപ്പെടുന്നു, കൂടാതെ ചില പോളിസികള്‍ റീഇംബേഴ്‌സ്‌മെന്റിന് യോഗ്യത നേടുന്നതിന പ്രത്യേക സമയം സജീകരിച്ചിട്ടുണ്ട്.
യാത്രാ ഇന്‍ഷുറന്‍സ് എടുക്കുമ്പോള്‍ തന്നെ ആനുകൂല്യങ്ങള്‍ ചോദിച്ചു മനസിലാക്കണം. രണ്ടോ മൂന്നോ പോളിസികള്‍ തമ്മില്‍ താരതമ്യം ചെയ്തിട്ടുവേണം പോളിസി എടുക്കാന്‍.