മുതിർന്ന സിപിഎം നേതാവ്. പാർട്ടി പൊളിറ്റ് ബ്യൂറോ അംഗം. മുൻ സംസ്ഥാന ആഭ്യന്തര മന്ത്രി. സിപിഎം മുൻ സംസ്ഥാന സെക്രട്ടറി. വിദ്യാർഥി പ്രസ്‌ഥാനത്തിലൂടെ രാഷ്‌ട്രീയത്തിലെത്തി സിപിഎമ്മിന്റെ പരമോന്നത സമിതിയായ പൊളിറ്റ് ബ്യൂറോയിൽ വരെയെത്തിയ കോടിയേരി ബാലകൃഷ്ണൻ കമ്യൂണിസ്‌റ്റുകാരന്റെ ചിരിക്കുന്ന മുഖമാണ്.
സിപിഎം ഈങ്ങയിൽപീടിക ബ്രാഞ്ച് സെക്രട്ടറിയായി പാർട്ടിയിൽ സജീവമായ അദ്ദേഹം ബിരുദ വിദ്യാർഥിയായിരിക്കേ, 20–ാം വയസിൽ എസ്എഫ്െഎ സംസ്ഥാന സെക്രട്ടറിയായി. ആറുവർഷം സിപിഎം കണ്ണൂർ ജില്ലാ സെക്രട്ടറിയായിരുന്നു. രാഷ്‌ട്രീയ പ്രക്ഷോഭങ്ങളിലും പാർലമെന്ററി രംഗത്തും ഒരുപോലെ ശോഭിച്ച അദ്ദേഹം അഞ്ചു തവണ നിയമസഭാംഗമായി. 2006ലെ വി.എസ്. അച്യുതാനന്ദൻ മന്ത്രിസഭയിൽ ആഭ്യന്തരമന്തിയായിരുന്നു. സിപിഎമ്മിന്റെ തീപ്പൊരി പ്രസംഗകരിൽ ഒരാളാണ്.
