ജാഫ്ന ബീച്ചില്‍ നിന്നും കുടുംബചിത്രം പങ്കുവച്ച് നടി രംഭ
Mail This Article
ആന്ധ്രാപ്രദേശില്‍ നിന്നും വന്ന് തെന്നിന്ത്യയുടെ ഹൃദയത്തുടിപ്പായി മാറിയ നടിയാണ് രംഭ. തൊണ്ണൂറുകളില്‍ തുടങ്ങി രണ്ടായിരാമാണ്ടിന്‍റെ തുടക്കം വരെ, തെലുങ്കിലും തമിഴിലും മലയാളത്തിലും ഹിന്ദിയിലും കന്നഡയിലുമെല്ലാം സജീവമായിരുന്നു രംഭ. ഹരിഹരന്‍റെ സര്‍ഗ്ഗത്തിലൂടെ മലയാളസിനിമയില്‍ സ്ഥാനം ഉറപ്പിച്ച രംഭ പിന്നീട് ചമ്പക്കുളം തച്ചന്‍, ക്രോണിക് ബാച്ചിലര്‍, സിദ്ദാര്‍ത്ഥ തുടങ്ങിയ ഹിറ്റ്‌ സിനിമകള്‍ ചെയ്തു. വിവാഹശേഷം ഭര്‍ത്താവിനും മൂന്നു കുട്ടികള്‍ക്കുമൊപ്പം ടോറോന്റോയില്‍ സ്ഥിരതാമസമാണ് രംഭ. തന്‍റെ ജീവിതത്തിലെ മനോഹര മുഹൂര്‍ത്തങ്ങളും യാത്രാവിശേഷങ്ങളുമെല്ലാം രംഭ സമൂഹമാധ്യമങ്ങളിൽ പങ്കുവയ്ക്കാറുണ്ട്. കുടുംബത്തോടൊപ്പമുള്ള ജാഫ്ന യാത്രാ ചിത്രങ്ങളാണ് രംഭ ഇന്‍സ്റ്റഗ്രാമില്‍ പോസ്റ്റ്‌ ചെയ്തിരിക്കുന്നത്.
ശ്രീലങ്കയുടെ വടക്കേ അറ്റത്ത് സ്ഥിതി ചെയ്യുന്ന ജാഫ്നാ ബീച്ച്, വളരെ പ്രകൃതിഭംഗിയാര്‍ന്ന പ്രദേശമാണ്. ശാന്തമായ നീലക്കടലും വൃത്തിയുള്ള വെളുത്ത മണല്‍ വിരിച്ച തീരവുമെല്ലാമുള്ള ബീച്ച്, തിരക്കുകളില്‍ നിന്നു രക്ഷപ്പെടാന്‍ ആഗ്രഹിക്കുന്നവര്‍ക്കു വളരെ അനുയോജ്യമാണ്.
ഈ ഭാഗത്ത് ഒന്നിലധികം ബീച്ചുകളുണ്ട്. കരൈനഗർ ദ്വീപിലെ കസുവാരിന ബീച്ചാണ് ഏറ്റവും പ്രശസ്തമായ ബീച്ചുകളിൽ ഒന്ന്. ആഴം കുറഞ്ഞ വെള്ളമാണ് ഇവിടെ ഉള്ളത്. മറ്റൊരു ശ്രദ്ധേയമായ സ്ഥലം ശാന്തമായ ചാർട്ടി ബീച്ചാണ്. ഇവിടെ മീന്‍ പിടിക്കുന്ന ആളുകളുമായി നേരിട്ട് ഇടപഴകാം, സൂര്യാസ്തമയക്കാഴ്ച ആസ്വദിക്കാം.
ജാഫ്നയെന്നാൽ ബീച്ചുകൾ മാത്രമല്ല. ചരിത്രവും സംസ്‌കാരവും ആത്മീയതയും കൊണ്ട് സമ്പന്നമായ ഒരു പ്രദേശമാണിത്. പ്രശസ്തമായ വേറെയും ഒട്ടേറെ ആകര്‍ഷണങ്ങള്‍ ഇവിടെയുണ്ട്.
ശ്രീലങ്കയിലെ ഏറ്റവും പ്രധാനപ്പെട്ട ഹൈന്ദവ ക്ഷേത്രങ്ങളിൽ ഒന്നായ നല്ലൂർ കന്ദസ്വാമി കോവിൽ ജാഫ്നയിലെ പ്രസിദ്ധമായ ഒരിടമാണ്. അതിമനോഹരമായ കൊത്തുപണികളുള്ള സ്വർണ്ണ ഗോപുരവും ദ്രാവിഡ വാസ്തുവിദ്യാ വൈദഗ്ധ്യവും വിസ്മയകരമായ കാഴ്ചകളാണ്.
1618 ൽ പോർച്ചുഗീസുകാർ പണികഴിപ്പിച്ചതും പിന്നീട് ഡച്ചുകാരാൽ കെട്ടിപ്പടുത്തതുമായ ജാഫ്നാ കോട്ട, കൊളോണിയൽ അധികാര പോരാട്ടങ്ങളുടെ പ്രതീകമാണ്. നൈനത്തീവ് എന്നും അറിയപ്പെടുന്ന നാഗദ്വീപിലേക്ക് ഫെറി സവാരി നടത്താം. ഇവിടുത്തെ നാഗദീപ പുരാണ വിഹാരയും നാഗപൂഷണി അമ്മൻ ക്ഷേത്രവും സന്ദര്‍ശിക്കാം.
ജാഫ്നയിലെ കീരിമല ബീച്ചിന് സമീപം സ്ഥിതി ചെയ്യുന്ന കീരിമല നീരുറവകൾ പവിത്രമായി കണക്കാക്കപ്പെടുന്നു, ഇതിന് രോഗശാന്തി ഗുണങ്ങളുണ്ടെന്ന് വിശ്വസിക്കപ്പെടുന്നു. പുരുഷന്മാർക്കും സ്ത്രീകൾക്കുമായി പ്രത്യേകം തിരിച്ച ഭാഗങ്ങളില്‍ മുങ്ങിക്കുളിക്കാം, അതിനുശേഷം ശാന്തമായ കീരിമല ബീച്ചിൽ വിശ്രമിക്കാം.
ശ്രീലങ്കയുടെ ഏറ്റവും വടക്കേ അറ്റത്തുള്ള പോയിന്റ് പെഡ്രോയിലേക്ക് ഡ്രൈവ് ചെയ്തു പോകാം. എപ്പോഴും കാറ്റു വീശുന്ന കടല്‍ത്തീരവും വിളക്കുമാടവുമെല്ലാം ഹൃദയം നിറയ്ക്കും.
മേയ് മുതൽ സെപ്റ്റംബർ വരെയുള്ള സമയമാണ് ജാഫ്നാ ബീച്ച് സന്ദർശിക്കാൻ ഏറ്റവും അനുയോജ്യമായ സമയം. ഒക്ടോബർ മുതൽ ജനുവരി വരെയുള്ള മഴക്കാലം ഒഴിവാക്കുന്നതാണ് നല്ലത്. കൊളംബോയിൽ നിന്ന് ജാഫ്‌നയിലേക്കു ട്രെയിന്‍ സവാരി നടത്താം, ഏകദേശം എട്ടു മണിക്കൂര്‍ നീളുന്ന ഈ യാത്ര, സുന്ദരമായ ഗ്രാമങ്ങളിലൂടെയും പച്ചപ്പും വന്യജീവികളും നിറഞ്ഞ വനഭൂമികളിലൂടെയും സഞ്ചാരികളെ കൊണ്ടുപോകുന്നു.
