ട്രെയിൻ പിടിച്ചിട്ടു; റോഡിലും ഗതാഗതം തടസ്സപ്പെട്ടു

മുഴപ്പിലങ്ങാട്∙ സിഗ്നൽ തകരാറിനെത്തുടർന്ന് ട്രെയിൻ ഒരു മണിക്കൂറോളം പിടിച്ചിട്ടു. ഇതെത്തുടർന്ന് മുഴപ്പിലങ്ങാട് കുളം ബസാർ റോഡിൽ  ഒരു മണിക്കൂറോളം ഗതാഗതം തടസ്സപ്പെട്ടു. റെയിൽവേ ഗേറ്റിലാണ് ട്രെയിൻ നിർത്തിയിട്ടത്. ഇന്നലെ വൈകിട്ട് 5.42 നാണ് എടക്കാട് റെയിൽവേ സ്റ്റേഷൻ പരിസരത്തെ സിഗ്നൽ തകരാറിലായത്. കണ്ണൂരിലേക്ക് വരികയായിരുന്ന തിരുനെൽവേലി–ജാം നഗർ എക്സ്പ്രസാണ് നിർത്തിയിട്ടത്. 6.20 ന് സിഗ്നൽ തകരാർ പരിഹരിച്ചതോടെ ട്രെയിൻ കണ്ണൂർ ഭാഗത്തേക്ക് യാത്ര തുടങ്ങി.  അതുവരെ മുഴപ്പിലങ്ങാട് നിന്ന് ഡ്രൈവ് ഇൻ ബീച്ചിലേക്ക് പോകുന്ന റോഡിലെ ഗതാഗതം തടസ്സപ്പെട്ടു.