വാഹനങ്ങൾ പൊലീസ് തടഞ്ഞിട്ടു; പ്രതിഷേധവുമായി തീർഥാടകർ

എരുമേലി ∙ പൊലീസ് എരുമേലിയിലെ പാർക്കിങ് മൈതാനങ്ങളിൽ വാഹനങ്ങൾ തടഞ്ഞതോടെ തീർഥാടകർ റോഡ് ഉപരോധിച്ചു. പമ്പയിലും നിലയ്ക്കലിലും തീർഥാടക വാഹനങ്ങളുടെ തിരക്കേറിയതോടെയായിരുന്നു പൊലീസ് നടപടി.ഇന്നലെ വൈകിട്ട് 3നാണു സംഭവം. പേട്ടതുള്ളൽ പാതയിലെ ജമാഅത്ത് മൈതാനത്തിനു മുന്നിലാണ് കർണാടക, തമിഴ്നാട് തീർഥാടകർ റോഡ് ഉപരോധിച്ചത്. പൊലീസ് അനുനയിപ്പിക്കാൻ ശ്രമിച്ചെങ്കിലും തീർഥാടകർ വഴങ്ങിയില്ല. ഇതോടെ നഗരത്തിലും കാഞ്ഞിരപ്പളളി, മുണ്ടക്കയം, റാന്നി റോഡുകളിലും കിലോമീറ്ററുകളോളം ഗതാഗത തടസ്സം ഉണ്ടായി. നാട്ടുകാർ ഏറെ ബുദ്ധിമുട്ടി. വൈകാതെ വാഹനങ്ങൾ കടത്തിവിടാമെന്ന് പൊലീസ് ഉറപ്പു നൽകിയതോടെയാണ് തീർഥാടകർ പ്രതിഷേധം അവസാനിപ്പിച്ചത്. 2 മണിക്കൂറിലധികം റോഡിൽ തടസ്സം ഉണ്ടായി. ഇന്നലെ പുലർച്ചെ മുതൽ പൊലീസ് പാർക്കിങ് മൈതാനങ്ങളിൽ തീർഥാടക വാഹനങ്ങൾ നിയന്ത്രിച്ചിരുന്നു. രാവിലെ അരമണിക്കൂർ ഇടവിട്ട് 10 വാഹനങ്ങൾ വീതമാണ് കടത്തിവിട്ടത്.