കൂത്താളി ടൗണിൽ ചെളി നിറഞ്ഞു; ഇരുചക്ര വാഹനങ്ങൾ തെന്നി വീഴുന്നു

പേരാമ്പ്ര ∙ കൂത്താളി ടൗൺ ചെളിയിൽ കുളിച്ച് വാഹനങ്ങൾക്കു പോകാനും ജനങ്ങൾക്ക് നടക്കാനും പറ്റാത്ത അവസ്ഥ. ജലനിധി പദ്ധതി പൈപ്പിടാൻ ഉണ്ടാക്കിയ കുഴിയിൽ നിന്നു റോഡിൽ എടുത്തിട്ട മണ്ണ് മഴ പെയ്തപ്പോൾ ഒലിച്ച് റോഡിൽ എത്തിയതാണ് പ്രശ്നമായത്. കുറ്റ്യാടി –കോഴിക്കോട് റോഡിൽ കടിയങ്ങാട് നിന്നു പേരാമ്പ്ര ഭാഗത്തേക്ക് വരുമ്പോൾ കൂത്താളി ടൗണിൽ വലിയ വളവും ചെറിയ ചെരിവും ഇറക്കവുമാണ്.

ഇറക്കവും ചെരിവും ഉള്ളതിനാൽ മണ്ണ് താഴേക്ക് ഒലിച്ചിറങ്ങിയാണു ടൗൺ പൂർണമായി ചെളിയായത്. ഇരുചക്ര വാഹനങ്ങൾ ചെളിയിൽ വീണു പല യാത്രക്കാർക്കും പരുക്കേറ്റിട്ടുണ്ട്. കൂത്താളി എയുപി സ്കൂളിനു മുന്നിലെ റോഡിൽ പൂർണമായി ചെളി നിറ‍ഞ്ഞതു കാരണം കുട്ടികൾക്ക് സ്കൂളിൽ എത്താൻ പോലും പ്രയാസമാണ്. എത്രയും പെട്ടെന്ന് പ്രശ്നം പരിഹരിക്കണമെന്ന് നാട്ടുകാർ ആവശ്യപ്പെട്ടു.