പ്രമുഖരുടെ പിന്തുണ തേടി വിവിധ സ്ഥാനാർഥികൾ; മതനേതാക്കളെയും മുതിർന്ന രാഷ്ട്രീയ നേതാക്കളെയും സന്ദർശിച്ചു

മലപ്പുറം ∙ സമസ്ത പ്രസിഡന്റ് മുഹമ്മദ് ജിഫ്രി മുത്തുക്കോയ തങ്ങളെയും ജനറൽ സെക്രട്ടറി കെ.ആലിക്കുട്ടി മുസല്യാരെയും സന്ദർശിച്ച് യുഡിഎഫ് സ്ഥാനാർഥികളായ ഇ.ടി.മുഹമ്മദ് ബഷീറും (മലപ്പുറം) എം.പി.അബ്ദുസ്സമദ് സമദാനിയും (പൊന്നാനി). ടി.കെ.ഹംസയെ സന്ദർശിച്ച് മലപ്പുറത്തെ എൽഡിഎഫ് സ്ഥാനാർഥി വി.വസീഫ്. ഇ.ശ്രീധരന്റെ അനുഗ്രഹം തേടി പൊന്നാനിയിലെ എൻഡിഎ സ്ഥാനാർഥി നിവേദിത സുബ്രഹ്മണ്യൻ. വോട്ട് അഭ്യർഥിച്ചുള്ള യാത്രയ്ക്കിടയിലും ജില്ലയിലെ പ്രമുഖരുടെ പിന്തുണ കൂടി തേടിയായിരുന്നു ഇന്നലെ വിവിധ സ്ഥാനാർഥികളുടെ യാത്ര. 

ഇ.ടി.യും സമദാനിയും ജിഫ്രി തങ്ങളെ അദ്ദേഹത്തിന്റെ വസതിയിലെത്തിയാണ് സന്ദർശിച്ചത്. പട്ടിക്കാട് ജാമിഅ നൂരിയയിലെത്തിയാണ് ആലിക്കുട്ടി മുസല്യാരെ കണ്ടത്. അവിടെ വിദ്യാർഥികളുമായും സംവദിച്ചു. വൈകിട്ട് ഇ.ടി. മഞ്ചേരിയിലും സമദാനി താനൂരിലും റോഡ് ഷോ നടത്തി. ടി.െക.ഹംസയെ വീട്ടിലെത്തി കണ്ട വസീഫ് തുടർന്ന് മുൻ ജില്ലാ സെക്രട്ടറി കെ.സൈതാലിക്കുട്ടിയുടെ പത്നി ഫാത്തിമയെയും സന്ദർശിച്ചു.  പ്രമുഖ അഭിഭാഷകൻ മഞ്ചേരി ശ്രീധരൻ നായരെയും വീട്ടിലെത്തി കൂടിക്കാഴ്ച നടത്തി. മലപ്പുറത്ത് ബാങ്ക് എംപ്ലോയീസ് ഫെഡറേഷൻ ഓഫ് ഇന്ത്യ യാത്രയയപ്പ്, കെഎസ്ടിഎ ജില്ലാ യാത്രയയപ്പ് സമ്മേളനങ്ങളിലും കോട്ടയ്ക്കൽ ആര്യവൈദ്യശാലാ പ്രവർത്തക കൺവൻഷനിലും പങ്കെടുത്തു.