സമ്പത്തും സൗഭാഗ്യവും കൊണ്ടുവരുമെന്ന് വിശ്വാസം; ഒരു കുഞ്ഞൻ പ്രാണിക്ക് 75 ലക്ഷം രൂപ വില!
![stag-beetle-expensive സ്റ്റാഗ് ബീറ്റിൽ (Photo: X/ @hwurmp)](https://img-mm.manoramaonline.com/content/dam/mm/mo/config-assets/mo-default.jpg?w=1120&h=583)
Mail This Article
ലോകത്ത് അനവധി പ്രാണികളുണ്ട്. അക്കൂട്ടത്തിൽ വലിയ വിലയുള്ള ഒരു പ്രാണിയാണ് സ്റ്റാഗ് ബീറ്റിൽ എന്ന ചീവീട്. ഒരെണ്ണത്തിന് 75 ലക്ഷം രൂപവരെയൊക്കെയാണ് വില. ഈ ചീവീടുകൾ അൽപം ഉഷ്ണമുള്ള മേഖലകളിൽ താമസിക്കുന്നവയാണ്. വനങ്ങളിൽ നിന്നുള്ള സസ്യദ്രവങ്ങളും ദ്രവിച്ച മരത്തടികളുമൊക്കെയാണ് ഇവയുടെ പ്രിയ ആഹാരം. മൂന്നു മുതൽ ഏഴു കൊല്ലം വരെയൊക്കെ ഇവ ജീവിക്കും.
എന്തുകൊണ്ടാണ് സ്റ്റാഗ് ചീവീടുകൾക്ക് ഇത്ര വില. പല കാരണങ്ങളുണ്ട് ഇതിനു പിന്നിൽ. ഈ ചീവീടുകൾ വളരെ അപൂർവമാണെന്നുള്ളതാണ് ഒരു കാരണം. ഇവ വലിയ സമ്പത്തും സൗഭാഗ്യവും കൊണ്ടുവരുമെന്ന് ചിലർക്കിടയിലുള്ള വിശ്വാസമാണ് മറ്റൊരു കാരണം. ഈ കാരണങ്ങളാണ് ഇവയുടെ വില കൂട്ടുന്ന ഘടകങ്ങൾ. ഇവയുടെ കൊമ്പുപോലെ പുറത്തേക്കു വളർന്നിരിക്കുന്ന മാൻഡിബിൾ വായ്ഭാഗം ആൺകലമാനുകളുടെ കൊമ്പുകളെ അനുസ്മരിപ്പിക്കുന്നവയാണ്. ഇതു കാരണമാണ് സ്റ്റാഗ് ബീറ്റിൽ എന്ന പേര് ഇവയ്ക്കു കിട്ടിയത്.
![stag-beetles സ്റ്റാഗ് ബീറ്റിൽ (Photo:X/@WildLondon)](https://img-mm.manoramaonline.com/content/dam/mm/mo/config-assets/mo-default.jpg)
തണുത്ത പരിതസ്ഥിതികളിൽ ഇവയ്ക്ക്ു ജീവിക്കാൻ പാടാണ്. കാടുകളാണ് പ്രിയ വാസസ്ഥലങ്ങളെങ്കിലും ചിലപ്പോഴൊക്കെ പാർക്കുകളിലും പൂന്തോട്ടങ്ങളിലുമൊക്കെ ഇവയെ അപൂർവമായി കാണാം. ഇവ ലാർവയായിരിക്കുന്ന കാലഘട്ടങ്ങളിലാണ് ഭക്ഷണത്തിലൂടെ വലിയ അളവിൽ ഊർജം സംഭരിക്കുന്നത്. ഈ ഊർജം പിന്നീട് ജീവിതകാലത്തുടനീളം ഉപയോഗിക്കും. ലാർവയായിരിക്കുന്ന കാലയളവിൽ ചീഞ്ഞ മരത്തടികളാണ് ഇവ ഭക്ഷിക്കുന്നത്. അതുകൊണ്ടുതന്നെ സസ്യങ്ങൾക്കോ മരങ്ങൾക്കോ ഇവ ഭീഷണിയല്ല.
2 മുതൽ ആറ് ഗ്രാം വരെ ഭാരം വയ്ക്കുന്ന ഈ ജീവികളെ ചിലയിടങ്ങളിൽ തദ്ദേശീയ ചികിത്സാരീതികളിലും ഉപയോഗിക്കാറുണ്ട്. ഇവ താമസിക്കുന്ന ആവാസവ്യവസ്ഥയിലെ പരിസ്ഥിതി പ്രവർത്തനങ്ങളിലും ഇവ ശ്രദ്ധേയമായ ഒരു പങ്കുവഹിക്കുന്നുണ്ട്.